मुख्यमन्त्री शाक्ययात बहुमत वइ ला ?

येँ -सरकारं बागमति प्रदेशया प्रदेश प्रमुख चीकेत सिफारिस याःगु दु । प्रदेश प्रमुख विष्णुप्रसाद प्रसाईंयात चीकाः यादव शर्मायात न्हूम्ह प्रदेश प्रमुख नियुक्ति यायेगु सिफारिस याःगु खः । प्रदेश प्रमुखय् सिफारिस जूम्ह यादव माधव नेपालया मनू खः ।

थ्वहे झ्वलय् बागमति प्रदेशया मुख्यमन्त्रीइ नियुक्त जुयादीम्ह मुख्यमन्त्री अष्टलक्ष्मी शाक्ययात बहुमत वइगु सम्भावना म्हो जक दुगु खँ सीदुगु दु । नेपाल पक्षया सांसदतय्सं यदि शाक्ययात साथ मबिल धाःसा मुख्यमन्त्री शाक्ययात सरकार टिके यायेत समस्या जुइफुगु खँ धाःगु दु ।

बागमति प्रदेशय् ११० म्ह सांसद दुगु खःसा छम्ह सांसद पशुपति चौलागाईं मदयेधुंकूगु दु । वय्कःया थाय् प्वनाच्वंगु दुसा प्रदेशय् मुक्कं १०९ म्ह सांसद दु । उकी मध्ये एमाले पार्टी अध्यक्ष ओली पुचःया ३४ म्ह सांसद दुगु खःसा नेपाल पुचःया २२ म्ह सांसद दुगु खः ।

पार्टी विभाजन लिपा अप्वः धइथें नेपाल पुचःया सांसद ओली पुचलय् तुं लिहां वंगु दुसा छु छुं सांसदपिं धाःसा नेपाल पुचलय् न्हूगु पार्टी दर्ता यायेत सक्रिय जूगुलिं उपिं एमालेय् लिहां वनेगु सम्भावना मदुगुलिं यानाः शाक्यया पद धरापय् लाःगु विश्लेषण जुयाच्वंगु दु ।

बागमति प्रदेशय् न्हापा एमालेया मुक्कं ५६ म्ह सांसद दुसा माओवादी केन्द्रया २३, कांग्रेसया २२, विवेकशील साझाया ३, मजदुर किसान पार्टी व राप्रपाया २ व छम्ह स्वतन्त्र सांसद यानाः १०९ म्ह सांसद दु । थ्व ल्याखं नेपाल पुचःया निम्ह जक सांसद दुसां नं शाक्ययात सरकार क्वःथलेत अःपुइगु विश्लेषण यानाहःगु दु ।