सन्दीप लामिछाने वेस्ट इन्डिज थ्यन

येँ (नेपालभाषा टाइम्स)- टी–२० विश्वकप २०२४ अन्तर्गत ग्वसाः देय् वेस्ट इन्डिजय् जुइगु कासा म्हितेत नेपाःया क्रिकेट कासामि सन्दीप लामिछाने वेस्ट इन्डिज थ्यंगु दु । निक्वः तक भिसाया निंतिं आवेदन बिउसां अमेरिकां भिसा मबिउगुलिं अमेरिकाय् जूगु नेपाःया कासा म्हितेमखम्हं सन्दीपं आः वेस्ट इन्डिजय् जुइगु निगुलिं कासाय् ब्वति काइगु जूगु दु ।

नेपालं वेस्ट इन्डिजय् दक्षिण अफ्रिका व बंगालदेशलिसे म्हितीगु ज्याझ्वः दु । भिसा मबिउगुलिं सन्दीपं अमेरिकाय् जूगु नेदरल्याण्ड्सलिसेया कासा म्हितेमखंगु खःसा बुधवाः जुइगु श्रीलंका विरुद्धया कासा नं म्हितेखनी मखु । टी–२० विश्वकप अमेरिका व वेस्ट इन्डिजय् जुयाच्वंगु दु ।

नेपालं क्रिकेट संघ (क्यानंं) छगू विज्ञप्ति पिकयाः सन्दीपं वेस्ट इन्डिजय् टी–२० विश्वकप म्हितीगु जानकारी बिउगु खः । क्यानं पित बिउगु विज्ञप्तिइ उच्च अदालतं मे १५ तारिखय् सन्दीपयात सफाइ बिउगुलिं वयात राष्ट्रिय टिमय् दुथ्याकागु धयातःगु दु । टिमय् दुथ्यानाच्वंम्ह प्रतिश जिसीयात क्यानं ट्राभिलिङ रिजर्भय् तयायंकूगु खः । विज्ञप्तिइ कथं मे १६ तारिख निसें हे सन्दीप नेपाःया टिमय् दुगु तर अमेरिकां भिसा मबिउगुलिं आइसीसीलिसे सहलह यानाः सन्दीपं वेस्ट इन्डिजय् म्हितेत्यंगु धयातःगु दु ।

सन्दीप लामिछाने सोमवाः वेस्ट इन्डिज थ्यनेधुंकूगु दु । लामिछानें सामाजिक सञ्जाल फेसबुक मार्फत वेस्ट इन्डिजय् थ्यंगु थःगु किपा पोस्ट यासें थम्हं वेस्ट इण्डिजय् नेपाली टिमया निंतिं म्हितेगु जुइ धाःगु खः । । लामिछानें क्यानया अध्यक्ष चतुरबहादुर चन्द व सचिव पारस खड्कायात थःगु विश्वकप यात्रायात सम्भव यानाबिउगुलिं सुभाय् नं बिउगु दु ।