बुद्ध शिक्षाया आधारभूत तालिम क्वचाल

ख्वप- मैत्रेय युवा संघया ग्वसालय् जूगु बुद्ध शिक्षाया आधारभूत तालिम क्वचाःगु दु । संघया रजत जयन्तीया लसताय् न्ह्यानाच्वंंगु थीथी ज्याझ्वःमध्ये छगू बुद्ध शिक्षा तालिम वंगु शनिवाः क्वचाःगु खः।
कोरोनाया कारणं दिनाच्वंगु तालिम थ्व हे भदौ ५ निसें १३ गतेतक वालय् निक्वः शनिवाः व बुधवाः जूम प्रविधि मार्फत अनलाइन तालिम जूगु खः । थ्व स्वयां न्ह्यः वंगु बैशाख १६ गते लकडाउन जारी जुइ न्ह्यः कृष्णकुमार प्रजापतिं भौतिक उपस्थितिइ हे तालिम संचालन याना वयाच्वंगु खः ।

भिक्षु मेघंकरया प्रमुख आतिथ्यताय् भिक्षु धम्माशोभन महास्थविरं पञ्चशिल बिया बिज्याःगु तालिम समापनया ज्याझ्वलय् प्रशिक्षार्थीलिसें प्रशिक्षकपिंत दसिपौ नापं मैत्री चिं उपहारकथं लःल्हाःगु खः ।
भिक्षु मेधंकर, भिक्षु अर्जुन, ञानवति गुरुमां, अनागारिका अरियञाणी, बौद्ध विद्वान डा. त्रिरत्न मानन्धर, डा. जुनु बासुकला, मदनरत्न मानन्धर, अमिता धाख्वा, सविता धाख्वा, आचार्य खगेश्वर अर्याल, सन्चित बुद्धाचार्यपिंसं प्रशिक्षण बियादीगु खः ।

ज्याझ्वलय् नवासें प्रशिक्षकलिसें बौद्ध विद्वान मदनरत्न मानन्धरं बुद्ध धर्मं मनूतय्त नैतिकवान, चरित्रवान जुइत ग्वाहालि याइगु खँ कनादिल । एभरेष्ट इंग्लिश स्कुलया प्रिन्सिपल भक्त राजभण्डारीं परियत्ति शिक्षां मस्तय्त जेहेन्दार जुइत व दानी चरित्रया विकास यायेत ग्वाहालि जूगु खँ कनादिल ।

अथे हे जेन्युइन इंग्लिश स्कुलया भाइस प्रिन्सिपल अनन्त घिमिरें धर्म धइगु हे मानव धर्म खः धासें सम्प्रदाय धर्म जुइ फइमखु धयादिल । समापन ज्याझ्वलय् प्रशिक्षार्थीपिं एभरेष्ट इंग्लिश स्कुलया प्रकृति न्यौपाने, जेन्युइन इंग्लिश स्कुलया सुधादेवी श्रेष्ठ, कालिका माध्यमिक विद्यालयया पम्फा लामिछाने व नविन आधारभूत स्कुलया प्रद्युम्न पौडेलं नं तालिम सम्बन्धी नुगःखँ प्वंकादीगु खः ।

संघया अध्यक्ष लक्ष्मीचन्द्र वज्राचार्यया सभापतित्वय् तालिमया संयोजक तीर्थराज वज्राचार्यं परियत्ति शिक्षाया आवश्यकता व महत्वया विषयय् खँ कनादीगु ज्याझ्वलय् प्रमिला धुख्वां सुभाय् देछानादीगु खः । तालिमय् थीथी ब्वनेकुथिया शिक्षक, शिक्षिका लगायतपिनिगु सहभागिता दुगु खः ।