एमालेया यात्राय् अप्पा प्रहार

येँ (नेपालभाषा टाइम्स)- १ नम्बर प्रदेशय् (कोशी) नेकपा एमालें न्ह्याकूगु संकल्प यात्रायात अनया पहिचान पक्षधर आन्दोलनकारीतय्सं पनेगु कुतः याःगु दु । एमालेया यात्राय् पंगः थनेगु लागिं पहिचान आन्दोलनकारीतय्सं सिमा पालाः लिसें अप्पां कयेकेगु ज्या याःगु खः ।

थ्व झ्वलय् प्रहरीं पुलांम्ह मन्त्री गोपाल किराती सहित झिम्हेसित ज्वंगु दु । आन्दोलनकारीतय्सं एमालेया संकल्प यात्रा १ नम्बर प्रदेशय् दुहां वयेवं पनेगु धकाः न्हापा हे घोषणा यानातःगु खः । प्रहरीया कथं खोटाङया हलेसिइ लँय् सिमा पालाः क्वःथलेगु लिसें अप्पां कयेकूगु कारणं किराती सहितया कार्यकर्तात ज्वंगु खः ।

एमालेया मध्यपहाडी राजमार्ग केन्द्रित संकल्प यात्रा पनेगु निंतिं पहिचान पक्षधरतय्सं म्हिगःनिसें मध्य पहाडी लागाय् लाःगु जिल्ला अनिश्तिकालीन बन्द याःगु खः । १ नम्बर प्रदेश पुनः नामांकरण संयुक्त संघर्ष समितिं सकल्प यात्रायात प्रदेशय् दुमकायेगु योजना कथं पहाडी जिल्ला बन्द याःगु खः ।

पहिचानवादीतय्सं एमाले अध्यक्ष केपी शर्मा ओली, योगेश भट्टराई, महेश बस्नेत लिसें ‘कोशी’ प्रदेशया नामाकरणया इलय् मतदान याःपिं सांसदपिंत बहिष्कार याना वयाच्वंगु दु । थ्व स्वयां न्ह्यः एमाले अध्यक्ष ओली व भट्टराई च्वनावःगु गाडीइ अप्पां कयेकेगु ज्या जुइधुंकूगु दु । प्रदेशसभां २०७९ फागुन १७ गते प्रदेशया नां कोशी तयेवं पहिचानवादीतय्सं नां संशोधन यायेमाःगु माग यासें आन्दोलन याना वयाच्वंगु दु ।

मुख्यमन्त्रीया गाडीइ नं अप्पां कयेकल
पहिचानवादी आन्दोलनकारी– तय्सं १ नम्बर प्रदेशया मुख्यमन्त्री केदार कार्की च्वनावःगु गाडीइ नं अप्पां कयेकाः आक्रमण याःगु दु । झापाया दमकय् पहिचान पक्षधरतय्सं मुख्यमन्त्री कार्कीयात हाकुगु ध्वाँय् क्यनेगु लिसें वय्कः च्वना वःगु सरकारी गाडीइ अप्पां कयेगूगु खः ।
पहिचान पक्षधरतय्सं कयेकूगु अप्पां लानाः मुख्यमन्त्रीया गाडीया न्हाय्कं तज्याःगु दु । दमकय् जूगु छगू ज्याझ्वलय् ब्वति कायेत मुख्यमन्त्री कार्की उखे वनाच्वंगु खः । वय्कःया गाडीया न्ह्यःने लिउने सुरक्षाया गाडी दुगु खःसां मोडय् गाडीया गति म्हो जूगु मौकाय् लाकाः अप्पां कयेकूगु खः ।