फिल्मय् ‘हिजो आजका कुरा’

येँ – लोकंह्वाःगु पुलांगु टेलिभिजन श्रृंङ्खला ‘हिजो आजका कुरा’ आः फिल्म जुयाः पिहां वइगु जूगु दु । टेलिभिजन श्रृंखला लिपा फिल्मय् नं नांजाःम्ह कलाकार सन्तोष पन्त हे मू भूमिकाय् खनेदयेकः वइसा फिल्मया निर्देशन पन्तया हे काय सकार पन्तं याइगु जूगु दु । शुक्रवाः फिल्मया शुभमूर्हुत जूगु खःसा स्वन्ति लिपा फिल्म सुटिङ्गय् वनीगु खँ धाःगु दु ।

स्वनिगलय् च्वनाच्वंपिं प्यंगू परिवारया बाखं दुथ्याइगु थ्व फिल्म नं सामाजिक, कमेडी विषयय् जुइगु खँ धाःगु दु । पन्त फिल्म प्रोडक्सनं दयेकीगु थ्व फिल्मय् सन्तोष पन्तया लिसें रमा थपलिया, नितेशराज पन्त, ऋचा शर्मा, केकी अधिकारी, रिमा विश्वकर्मा, जेबिका कार्की, रमेश अधिकारी, सविन शाक्यया लिसें न्हूपिं कलाकार विनायक कुँइकेल, अनुष्का अधिकारीया मू भूमिका दइ ।

फिल्मया छायाँकन रवि साय्मिं यानादीसा ग्राफिक्स, भिएफक्स व सम्पादन विनय कंसाकारया दइ । सन्तोष पन्त व सकार पन्तया बाखंयात सन्दीप किस्नां च्वयातःगु दु ।