शंखधरया मूर्ति ताँ क्वय् वांछ्वःपिं सु खः ?

येँ (नेपालभाषा टाइम्स)- येँ महा नगरपालिकाया नगर प्रहरीतय्सं येँया छगू ताँ क्वय् लूगु धकाः सार्वजनिक याःगु शंखधर साख्वाःया मूर्ति बारे सर्वसाधारणया चिउताः ब्वलंगु दु ।

नगर प्रहरीतय्सं उगु मूर्तिया किपा सामाजिक सञ्जालय् तःसां नं मूर्ति गन लूगु धकाः थाय् धाःसा खुले मयाः । उमिसं थ्व मूर्ति ‘ऐतिहासिक’ धासें पुरातत्व विभागयात लःल्हायेगु खँ नं धाःगु दु । तर थ्व मूर्ति वास्तवय् येँ २० वडास्थित परोपकार नापसं च्वंगु क्यबय् तयातःगु खः धइगु सीदुगु दु ।

छुं ई न्ह्यः तिनि उगु ताँ क्वय् शर्टकट लँ दयेकूबलय् क्यब स्यंका छ्वःगु खःसा नापनापं अन तयातःगु शंखधरया मूर्ति नं वांछ्वया बिउगु खः । अबले उगु मूर्तियात वहे ताँ क्वय् ल्हाका छ्वःगु आः नगर प्रहरीं लुइकूगु खः ।

स्थानीय न्हू पुचःया नायः मनरत्न शाक्यं कनादीकथं थ्व २०–२५ दँ जक पुलांगु मूर्ति जूगु कारणं पुरातात्विक ज्वलं मखु । उकिं थुकियात पुरातत्व विभागयात बीमाःगु आवश्यकता नं मदु । शाक्यं सामाजिक संजालय् तःगु बिचाः तसें आः वहे ताँ क्वय् छगू चीधंगु जूसां क्यब दयेकाः थ्व मूर्ति अन हे पलिस्था यायेमाःगु माग नं यानादीगु दु ।