पुलुकिसियात मगाः सरकारी खर्च
नीलः साय्मिपाखें
‘ला छकू वयेक समय्बजि, वल वल पुलुकिसि…’ यँयाःयात झःझः धायेकीगु पात्रत मध्ये पुलिकिसि छम्ह नं मूम्ह खः । थुम्ह पुलुकिसि येँया किलागः त्वालं थनिंनिसें च्यान्हु तक पिहां वइसा थ्व पुलुकिसिया ख्वाःपाः दँय्दसं थें थुगुसी नं लंपुं छायेकाः म्हिगः किलागलय् हयेगु ज्या जुल ।
पँथं जक दयेकातःगु थुगु पुलु–किसिइ पुलु धाःसा छ्यलेगु मयाः। थुम्ह पुलुकिसि जात्रा यायेत जात्रा ज्वःछि थ्यंमथ्यं न्यागू लाख तका खर्च जू वंसा जात्रा चले यायेत सरकारं धाःसां मुक्कं खुइद्वः तका जक बीगु यानातःगु खँ गुथिया दुजः मचाराजा महर्जनं कनादीगु दु । थुगु दँय् पुलुकिसिया म्हगः नं लगभग न्हूगु हे दयेकेगु ज्या जूगु दु ।
पुलांगु म्हगः आपाः हे स्यंगु जूगुलिं थुगुसी न्हू दयेकेमाःगु खँ दुजः कविन्द्र महर्जनं कनादिल । थुगुसी बाजं स्यंगु जूगुलिं बाजं छगःया जक २९,०००÷– तका तूगु व भुस्याः ९,०००÷– तका तूगु खँ वय्कलं कनादिल ।
लिसें न्हापा जूसा किसिया लं जात्राज्वःछि निपाः जक दःसा गाःगुली आः न्हिं छपाः लं तये माला च्वंगु व छपाःया लंया च्याद्वः निसें गुद्वः तका तक तूवःगु व थ्व ल्याखं स्वयेगु खःसा लं जक जात्राज्वःछि ६० निसें ७० हजार तू जुयाः सरकारं बीगु ग्वाहालि ला लनय् जक ठिक्क जूगु खँ दुजः कविन्द्र महर्जनं धयादिल ।
पुलुकिसिया ख्वाःपालय् लंपुं छायादीम्ह मासंगाः (थौं कन्हय् छाउनी) च्वनादीम्ह राजेन्द्र चित्रकारं पुलुकिसिया ख्वाःपाः पूवंक दयेकेत म्होति नं निलानिसें स्वला माःगु तर सामान्य मर्मत व लंपुं छायेत लछि माःसा लंपुं छायेत दकलय् न्हापां क्षमा पुजा यानाः जक ज्या न्ह्याकेमाःगु खँ कनादिल । प्राणप्रतिष्ठा यानामतःगु जूगुलिं थुकी लंपुं छायेत बारे धाःसा याये म्वाःगु जुयाच्वन ।
थुगु पुलुकिसिया ख्वाःपाः डण्डि, बोरा, कापः व नेपाली भ्वंया दयेका तइगु खँ चित्रकारं कनादिल । थुगु ख्वापाः थ्यंमथ्यं ६० निसें ७० किलोया जुइ । लंपुं छायेगुया ज्याला थुलि हे धकाः मकयागु तर गुथिया श्रद्धां गुलि बिल उलि कयाच्वनागु खँ नं वय्कलं कनादिल । थगुने १२,०००÷– तका ज्याला स्वरुप वःगु खँ वय्कलं कनादिल ।
जात्रा चले यायेत बियातःगु ६० द्वः तका मगाः धकाः तःक्वः जानकारी याःसां आःतक उकिया सुनुवाइ मजूगु व थुगु जात्रा चलेयायेत निजी गुथिं हे ध्यबा ल्हानाः व थीथी थासय् प्याखं क्यनाः वःगु ग्वाहालि जात्रा चले यानाच्वनागु खँ नं महर्जनं धयादिल ।
LEAVE YOUR COMMENTS