छत्रपाटी निःशुल्क व टेकु अस्पतालयात महानगरपालिकां भेन्टिलेटर लःल्हात

येँ – येँ महानगरपालिकां शुक्रराज ट्र«पिकल अस्पताल टेकु व छत्रपाटी निःशुल्क चिकित्सालय, क्षेत्रपाटीइ म्हतिं निगः निगः भीजी ७० मोडलया भेन्टिलेटर लःल्हाःगु दु । वंगु बिहिवाः येँ मनपा प्रमुख विद्यासुन्दर शाक्यया उपस्थितिइ जनस्वास्थ्य विभागया प्रमुख हरिबहादुर कुँवर व अस्पतालया निर्देशकपिनि दथुइ सम्झौता यानाः थ्व उपकरण लःल्हाःगु खः ।

येँ मनपायात थ्व उपकरण भगिनी सहर तिव्वतया ल्हासां ग्वाहालि कथं छ्वयाहःगु खः ।
भेन्टिलेटर लःल्हासें महानगर प्रमुख शाक्यं थनिंनिसें हे भेन्टिलेटर सञ्चालनय् हयाः जनता जीवन बचे यायेगु ज्या यायेत धयादीगु खः ।

भेन्टिलेटर लःल्हाना कासें टेकु अस्पतालया निर्देशक डा. सागरकुमार राजभण्डारीं कोविड संक्रमणं स्वास्थ्य क्षेत्रयात हे कठिन अवस्था वयाच्वंगु इलय् महानगरं बिउगु भेन्टिलेटरं अस्पतालं थप सेवा बीफइगु खँ धयादिल । अथेहे निःशुल्क चिकित्सालयया अध्यक्ष डा. मनोजमान श्रेष्ठं छत्रपाटी अस्पतालयात कोविड अस्पताल दयेकेत थप ग्वाहालि जूगु खँ धयादिल । छत्रपाटी चिकित्सालय महानगरया कोविड अस्पताल खः ।