गुथि सम्बन्धी विधेयकया प्यखेरं विरोध दना वल नेवाः खलः पुचःत

येँ – सरकारं गुथि व गुथिया जग्गा बारे न्हूगु व्यवस्था यायेत हःगु विधेयकयात कयाः नेवाः खलः पुचःतय्सं नं विरोध शुरु याना हःगु दु । थ्व झ्वलय् नेवाःतय् थीथी खलः पुचःतय् दथुइ आन्तरिक सहलह लिसें माल धाःसा आन्दोलनय् कुहां वयेगु तकया खँ जुयाच्वंगु सीदुगु दु ।

थ्वहे झ्वलय् नेवाःतय् राष्ट्रिय संगठन नेवाः देय् दबुलिं नेपाल सरकार, भूमि व्यवस्था, सहकारी तथा गरिबी निवारण मन्त्रालयं संघीय संसदय् हःगु गुथि सम्बन्धी विधेयकयात कयाः विरोध प्वंकूगु दु ।

नेवाः देय् दबूया नायः नरेश ताम्रकारं जारी याःगु प्रेस विज्ञप्तिइ राजगुथि, सार्वजनिक गुथि निजी गुथि व्यवस्थित यानाः सर्वसाधारण हित कायम यायेत व जग्गाया संरक्षण व उपयोग व्यवस्थाया लिसें गुथिया विकास, सञ्चालन व व्यवस्थापन यायेत थीथी गुथि सम्बन्धी कानुनयात एकीकरण व संशोधन यायेत बने जूगु विधेयक, २०७५ पेश जूगु विधेयक प्रति नेवाः देय् दबूया ध्यानाकर्षण जूगु खँ न्ह्यथनातःगु दु ।

सरकारं हःगु विधेयक २०७५ या दफा २३ स गुथिया हक व दायित्व प्राधिकरणय् वनीगु, दफा २४ स गुथिया अधिकार स्वतः समाप्त जुइगु, दफा २५ सं गुथिया लगत पेश यायेमाःगु व ५४ हक समाप्त जुइ धकाः विधेयकय् न्ह्यथनातःगु धासें उगु विधेयकं गुथिया जग्गा, परम्परागत त्वाः गुथि, चपाः मठमन्दिर बहाबही बिहार आदिया जग्गा रैतानी जुयाः व्यक्तिया नामय् केन्द्रीत जूगु खनेदुगुलिं प्राचीन इलंनिसें न्ह्याना वयाच्वंगु मूर्त अमूर्त गुथि छिन्न भिन्न जुयाः ऐतिहासिक संस्कृति व जात्रा पर्व गम्भीर लिच्वः लानाः गुथि परम्पराया अस्तित्व हे मदुइगु खतरा दुगु खँ न्ह्यथनातःगु दु ।

प्रेस विज्ञप्तिइ सरोकारवाला लिसें गुगु नं कथंया परामर्श सहला मयासें हःगु विधेयकं संस्कृति, सम्पदायात संरक्षित यानातःगु गुथि परम्परायात समाप्त यायेगु षडयन्त्र जूगु खँ न्ह्यथनातःगु दु ।थ्वहे गुथि सम्बन्धी विधेयकया विरोधय् म्हिगः येँया मार्टिन चौतारीइ नं छगू अन्तक्र्रिया ज्याझ्वः जूगु दु ।

उगु ज्याझ्वय् डा. केदारभक्त माथेमां नेपाःया लागिं गुथि छाय् आवश्यक खः व थ्व गुथि मंत धाःसा छु लिच्वः लाइ धइगु बारे बिचाः तयादीगु खः । अथे हे कन्हय् नं नेवाः राजनीतिक अभियानपाखें थुगु विधेयकयात कयाः छगू अन्तक्र्रिया ज्याझ्वः यायेत्यंगु दु । उकी गुथि संस्थानया पुलांपिं पदाधिकारीपिंसं विधेयकं लाकीगु लिच्वः बारे कनादीगु ग्वसाः दु ।