तिलौराकोटयात नं विश्व सम्पदा धलखय् दुथ्याकीगु

येँ- कपिलवस्तुया तिलौराकोट क्षेत्रयात विश्व सम्पदाया दुथ्याकेत मनोनयन दस्तावेज तयार यायेगु ज्या शुरु जूगु दु । नेपाः सरकारया संस्कृति मन्त्रालय, पुरातत्व विभाग व लुम्बिनी विकास कोषं अन्तर्राष्ट्रिय व राष्ट्रिय विज्ञपिनिगु कार्यशाला गोष्ठी यासें तिलौराकोटयात विश्व सम्पदाया धलखय् दुथ्याकेगु नितिं दस्तावेज तयार यायेगु ज्यायात तीव्रता बिउगु खः ।

कार्याशालाय् अन्तर्राष्ट्रिय विज्ञ डा. डङ्कन मार्सल (अष्टे«लिया) प्रा.डा. रविन कनिङ्गम (बेलायत), प्रा.डा. यूकियो निसिमुरा (जापान) लगायत नेपाःपाखेया विज्ञपिं काई वाइजे, प्रा.डा. राजेश राई, डा. इनु प्रधान, सृष्टिना श्रेष्ठ, राजेन्द्र सुवाल व एनी जोशीया उपस्थितिइ मनोनयन दस्तावेजयात कयाः विधागत सहलह जूगु खः ।

मनोनयन दस्तावेजय् पुरातत्व विभागया पुलांम्ह महानिर्देशक कोषप्रसाद आचार्य व पुरातत्वविद् बसन्त विडारीं विज्ञपिंसं पिकाःगु निष्कर्षय् सुझाव बिउगु खः । लुम्बिनी विकास कोषया प्रमुख प्रशासकीय अधिकृत ज्ञानिन राईया संयोजकत्वय् सम्पदा धलखय् दुथ्याकेगु नितिं मनोनयन दस्तावेजयात अन्तिम रुप बीत विज्ञपिं लिसे सहलह ब्याकूगु खः ।

सहलहया झ्वलय् लुम्बिनी विकास कोषया उपाध्यक्ष भिक्षु मेत्तयं तिलौराकोटयात विश्व सम्पदाया धखलय् फयांफछि याकनं दुथ्याके फइकथंया मनोनयन दतास्वेज दयेकाः उमियात अन्तिम रुप बीत विज्ञपिंत इनाप यानादीगु खः ।

वय्कलं आः तक जूगु अध्ययन, अन्वेषण, बौद्धकालीन अवस्था व थीथी इलय् तीर्थयात्रीया भ्रमण थेंज्याःगु आधारं तिलौराकोटयात विश्व सम्पदाया रुपय् म्हसीके फइगु खँ नं धयादीगु दु । संस्कृति, पर्यटन तथा नागरिक उड्डयन मन्त्रालयया सहसचिव डा. सुरेश श्रेष्ठं तिलौराकोटयात सन् १९९६ स विश्व सम्पदाया सम्भावित धलखय् दुथ्याकेधुंकूगुलिं आः सन् २०२४ तक सूचीकृत जुइ फइगु खँ कनादिल । (रासस)

सम्बन्धित बुखँ

LEAVE YOUR COMMENTS