गुथि विधेयक हानं हयेगु तयारी
येँ – नेवाः समुदाय दथुइ अतिकं विवादया विषय जुयाच्वंगु गुथि विधेयकयात सरकारं हानं न्ह्यःने यंकेगु तयारी यानाच्वंगु खँ सीदुगु दु । थुकिया लागिं भूमिसुधार मन्त्रालयं गृहकार्य शुरु यायेधुंकूगु खँ नं धाःगु दु ।
गुथि विधेयक न्ह्यःने यंकेगु लागिं थौंकन्हय् भूमिसुधार मन्त्री शशि श्रेष्ठ थः हे न्ह्यचिलाच्वंगु व उकिया लागिं वय्कलं गुथि आन्दोलनय् दुथ्याःपिं नेवाः न्ह्यलुवापिंत नापलानाः बिचाः कायेगु ज्या यानाच्वंगु खँ नं सीदुगु दु ।
सूत्रतय्सं धाःकथं गुथि विधेयकय् नेवाः समुदायया हितय् छु गज्याःगु बुँदा तल धाःसा पाय्छि जुइ धकाः राय बियादिसँ वा उकिया मस्यौदा हे दयेकाः छ्वयादिसँ धकाः तकं मन्त्री श्रेष्ठं इनाप यानाच्वंगु दु । आः तत्कालया लागिं थ्व विधेयकयात गय् यानाः न्ह्यःने न्ह्याकेगु धकाः सरकारं सरोकारवाला पुचःतलिसे प्रारम्भिक सहलह निं ब्याकेत्यंगु खँ सीदुगु दु ।
थ्वहे झ्वलय् सरकारं गुथि विधेयक हानं न्ह्यःने यंकेगु खँयात कयाः सहलह यायेगु लागिं नेवाःतय् राष्ट्रिय संगठन नेवाः देय् दबूपाखें थौं छगू मुँज्या सःतूगु दु । देय् दबूया ज्याकुथिइ च्वनीगु उगु मुँज्याय् सरकारं छ्वया हयाच्वंगु प्रस्ताव व उकी नेवाःतय्गु मंकाः राय दयेकेगु बारे सहलह जुइ धाःगु दु ।
सरकारं न्हापा दयेकूगु गुथि विधेयकय् आपालं त्रुटित पिहां वःगुलिं उकियात कयाः नेवाःतय्सं ऐतिहासिक कथंया विशाल प्रदर्शन याःगु खःसा उकिया हे तत्कालीन केपी ओलीया सरकारं विधेयक लित काःगु खः । आः वहे विधेयकयात न्ह्यःने न्ह्याकेमाःगु जुयाः अबलय् आन्दोलन याःपिं नेवाः समुदायलिसे खँल्हाबल्हा निं यायेमाःगु महसुस सरकारं याःगु खँ सीदुगु दु ।
अबलय् सरकारं हःगु गुथि विधेयकं नेवाःतय् गुथिइ हस्तक्षेप यानाः गुथिं न्ह्याकाच्वंगु जात्रा, पर्व, संस्कार, संस्कृति तकं प्रभावित यायेत स्वःगु द्वपं नेवाः समुदायं बिउगु खः ।
गुथि विधेयकबारे नेवाःतय् माग
सरकारं गुथि विधेयक पित हयेवं उकियात कयाः नेवाःतय्सं आम धारणा दयेकेगु कुतः याना हःगु खः । नेवाःतय्सं थःपिनि अवधारणाय् गुथि मार्फत सञ्चालन जुयाच्वंगु थःपिनि प्रथाजन्य कानूनयात मान्यता बीमाःगु व उकी गनं नं हस्तक्षेप यायेम मदइगु माग यानाच्वंगु दु । अथे हे नेवाःतय्सं सञ्चालन यानाच्वंगु निजी गुथिइ गनं नं हस्तक्षेप याये मदइगु व सामुदायिक गुथियात नं राज्यं नियमन याये मदइगु खँ न्ह्यथनाच्वंगु दु । अज्याःगु गुथि मासे मयायेगु लागिं राज्यं संरक्षण प्रदान याये माःगु तर संरक्षणया नामय् हस्तक्षेप धाःसा याये मदइगु खँ नं न्ह्यःने हयाच्वंगु दु । थ्व स्वयां न्ह्यः सरकारं हःगु विधेयकय् गुथिया फुक्क हे सम्पत्ति राज्यं कायेगु व गुथि सञ्चालनया ज्या तकं राज्यं यायेगु आसयया खँ दुथ्यानाच्वंगु खः ।
LEAVE YOUR COMMENTS