बालेनंं खुसिया मापदण्डय् एमालें विरोध याःगुया तं क्यन

येँ (नेपालभाषा टाइम्स)- सर्वोच्च अदालतया आदेश कथं खुसि सिथय् ४० मिटर तक छेँ दने दइ मखु धकाः येँ महानगरपालिकां याःगु निर्णयया विरुद्ध एमालेया सरकार व एमाले कार्यकर्तात सतकय् कुहां वयेवं येँ मनपाया मेयर बालेन साहं एमाले अध्यक्ष केपी ओलीयात प्रहार याना हःगु दु ।

म्हिगः छगू स्टाटस च्वसें सर्वोच्च अदालतया खुसि सम्बन्धी विवादपाखें मेथाय् ध्यान छ्वयेत स्वयादीगु दु । छुं ई न्ह्यः महानगरपालिकां उद्धार याना हःम्ह छम्ह छेँ ज्या याइम्ह मिसा मचायात मनपां अपहरण यात धकाः मचाया अबुं तःगु रिटयात कयाः मेयर बालेन साहं एमाले अध्यक्ष ओलीयात प्रहार यानादीगु खः । वय्कलं मिसा मचाया अबुं मनपा विरुद्ध रिट तःगु खःसां अदालतं उकियात खारेज याना बिउगुलिं मनपाया ज्या सही धइगु पुष्टि जूगु दावी यानादीगु खः । लिसें वय्कलं प्रम ओलीयात सम्बोधन यासें थः कार्यकर्तायात सामान्य ज्ञान बियाः जक राजनीतिइ लगे यानादिसँ धकाः ‘सुझाव’ बियादीगु खः ।

लुमंकेबहः जू, छुं ई न्ह्यः न्हू सतक लागाय् पेटी तब्या याये मखने सातकि नं वय्कलं केपी ओलीयात प्रहार यासें गिरिबन्धु चिया बगानया मुद्दा न्ह्यःने हयादीगु खः ।

सर्वोच्च अदालतं स्वनिःया बागमती, बिष्णुमती व मनोहरा खुसि सिथय् ४० मिटर लागा तक छेँ दने दइ मखु धकाः फैसला यायेवं स्थानीय पीडित जनतां उकिया विरोध याःगु खःसा एमाले नेतृत्वया वर्तमान सरकारं सर्वोच्चया आदेश पालना यानाः पीडितयात मुआब्जा बीगु हैसियत सरकारयाके मदुगु जूगुलिं उगु आदेश खारेज यायेत पुनरावलोकन याकेगु निर्णय याःगु खः । लिसें उगु आदेशया विरुद्ध एमाले येँ जिल्लां वक्तव्य पिकाःगु दुसा म्हीग मनपाया ज्याकुथिइ वनाः ज्ञापनपत्र समेत बिउगु खः । मेयर बालेन साहं एमोलया पुचःयात नं नापलायेत अस्वीकार यासें कर्मचारीयात ज्ञापनपत्र बुझे यानाः कायेके बिउगु खः । थ्व खँयात कयाः मेयर साहया कडा आलोचना जुयाच्वंगु दु । थःगु आलोचना छले यायेत वय्कलं ओलीयात प्रहार याःगु अनुमान जुयाच्वंगु दु ।

कांग्रेसपाखें नं मापदण्डया विरोध
सर्वोच्च अदालतं खुसिया मापदण्ड किटान यानाः बिउगु आदेशयात नेपाली कांग्रेसपाखें नं विरोध याइग संकेत खने दुगु दु । येँ मनपाय् कांग्रेसपाखें त्याःम्ह १७ वडाया अध्यक्ष लिसें मनपाया प्रवक्ता नविन मानन्धरं म्हिगः सामाजिक सञ्जालपाखें थःगु धापू तसें थ्व मापदण्ड खारेज यायेमाः धयादीगु दु । सर्वोच्च अदालतं आदेश बिउगु मापदण्ड पालना जुल धाःसा आपालं मनू प्रभावित जुइगु खँ धासें वय्कलं थ्व मापदण्ड खारेज जुइमाःगु बिचाः तयादीगु खः । मापदण्डयात कयाः नेपाली कांग्रेसपाखें आः तक सार्वजनिक रुपं छुं न्ववाःगु मदुनि ।