चाँदबागया जग्गा खाली यायेत उजं
येँ (नेपालभाषा टाइम्स)÷येँ महानगरपालिकां चाँदबाग स्कुलयात अतिक्रमित सार्वजनिक जग्गा खाली यायेत निन्हुया ई बिउगु दु । येँ मनपा वडा ३ य् च्वंगु थुगु स्कुलं १० रोपनी सार्वजनिक जग्गा अतिक्रमण यानातःगु खँ धाःगु दु । म्हिगः नगर प्रहरीं माइकिङ यासें निन्हुया दुने जग्गा खाली यायेत स्कुलयात निर्देशन बिउगु खः ।
बाँसबारी छालाजुत्ता कारखानाया तत्कालीन अध्यक्षया निर्णय कथं २०४४ साल भदौ ६ गते ६ रोपनी व मंसिर १८ गते थप ४ रोपनी यानाः कित्ता नं. ५० या १० रोपनी जग्गा च्याम्पियन फुटवेरया नामय् यंकूगु खःसा १० रोपनी जग्गा २०८० चैत ९ गते सरकारया नामय् वःगु खः । च्याम्पियन फुटवेरया जग्गा लिपा चाँदबाग स्कुलयात छ्यले बिउगु खः ।
येँ महानगर प्रहरीया कथं येँमनपां थ्व स्वयां न्ह्यः हे सार्वजनिक जग्गा खाली यायेत सुखं बिउगु खःसा वयां लिपा निन्हुया ई तनाः माइकिङ याःगु खः । निन्हुया दुने जग्गा खाली मयात धाःसा येँ मनपां बल छ्यलाः जग्गा खाली याकेगु खँ धाःगु दु ।
थ्वहे झ्वलय् स्कुल सञ्चालकतय्सं जग्गा खाली यायेत न्हय्न्हुया ई फ्वंगु खँ नगर प्रहरी बलं धाःगु दु । न्हय्न्हुया दुने नं संरचना मचीकल धाःसा स्कुलय् तालं ग्वयेगु खँ नं येँ मनपां धाःगु दु ।
LEAVE YOUR COMMENTS