विद्यासुन्दर शाक्यं शुरु याःगु नेपालभाषा ब्वनेज्यात निरन्तरता बीगु जुइ ः स्थापित

येँ – येँ मनपाया मेयर पदय् नेकपा (एमाले) पाखें उम्मेदवारी बियादीम्ह केशव स्थापितं थःगु हे पार्टीया वर्तमान मेयर विद्यासुन्दर शाक्यं शुरु यानादीगु नेपालभाषाया पठनपाठनयात निरन्तरता बीगु व उकियात अझ च्वन्ह्याका यंकेगु खँ कनादीगु दु ।

म्हिगः ‘नेपालभाषा टाइम्स’ लिसे खँ ल्हासें भाजु स्थापितं थ्व खँ कनादीगु खः । थः नं भाषा आन्दोलनया हे छम्ह कार्यकर्ता जूगु कारणं नेपालभाषा व संस्कृति सम्पदाया ख्यलय् शुरु जूगु फुक्क हे ज्यायात थम्हं निरन्तरता बीगु खँ नं वय्कलं कनादिल ।
अथे हे नेपालभाषा मंकाः खलःया दबूछेँ दनेगु ज्यायात पूर्णता बीगु लिसें मेमेगु नं भाषिक संस्थायात माःगु ग्वाहालि याना वनेगु खँ नं वय्कलं स्पष्ट यानादिल ।

स्थानीय विषयया पठन–पाठनयात निरन्तरता बीगु धकाः पार्टीपाखें हे जारी याःगु प्रतिवद्धता पत्रय् समेत उल्लेख जुयाच्वंगुलिं नेकपा (एमालें) शुरु याःगु थ्व बांलाःगु ज्यायात थम्हं अझ च्वन्ह्याका यंकेगु खँ नं वय्कलं कनादिल ।

सम्बन्धित बुखँ

LEAVE YOUR COMMENTS