केशवनारायण चोकया उत्तरीखण्ड प्रबलीकरणय् समस्या
यल – थनया लाय्कू लागा दुनेया केशवनारायण चोकया छगू खण्ड आतकं पुनःनिर्माण न्ह्याये फयाच्वंगु मदुनि । केशवनारायण चोकया उत्तरीखण्डया पुनःनिर्माणया ज्या आतकं शुरु याये मफयाच्वंगु खः । गुगुं नं भवन लगायत भौतिक संरचना पूवंक थुनाः न्हूगु दयेके फइगु जूसां नं जीर्ण जूगु व पुलांगुयात प्रबलीकरण यायेत धाःसा ई काइगु पाटन संग्रहालयया निर्देशक सन्दीप खनालं कनादिल ।
२०७२ साल बैशाखय् गोरखाया बारपाक केन्द्र विन्दु जुयाः ब्वःगु भुखाचं क्षतिग्रस्त जूगु उगु संरचना प्रबलीकरणया झ्वलय् समस्या पिहां वयेवं विज्ञनापं सहलह यानाः जक ज्या यायेत धायेवं पुनःनिर्माणया ज्या न्ह्याः वने मफयाच्वंगु खः । मल्लकालीन लाय्कूया रुपय् दयाच्वंगु उगु संरचना भुखाय् ब्वयाः क्षति जुइ स्वयां न्ह्यः इलय्व्यलय् मर्मत यायेगु ज्या जुया वयाच्वंगु खः ।
पुलांगु भवनय् ज्या यायेबलय् उकी छ्यलातःगु सामग्री विचाः याःगु स्वयां फरक अवस्थाय् लुया वयाच्वगु निर्देशक खनालं कनादिल ।
‘पुरातात्विक ल्याखं महत्वपूर्ण थज्याःगु पुलांगु संरचना इलय्व्यलय् मर्मत यायेगु ज्या जूसां उकी छ्यःगु सामग्री आपालं स्यने धुंकूगु जुइफु’ वय्कलं धयादिल, ‘गन थाय् लाक्क छु स्यनाच्वन धइगु खँ भवन स्यंकेबलय् वा थुना स्वयेबलय् जक बांलाक सी दइ, व स्वयां न्ह्यः पत्ता लगे जुइ मखु ।’
थ्व स्वयां न्ह्यः उगु हे चोकया दक्षिण खण्डया प्रबलीकरण यायेगु झ्वलय् नं गुगुं अप्पा तज्यानाच्वंगु, कुचा जुयाच्वंगु व गनं छखे जक धेचुया वनाः समस्या जुयाच्वंगु वय्कलं धयादिल । थन प्रयोग जूगु सामग्री न्हापा स्वयां व विचाः याःगु स्वयां फरक अवस्थाय् लुया वःगुलिं आः विज्ञलिसे परामर्श यानाः जक ज्या न्ह्याकेगु योजना दुगु वय्कलं धयादिल ।
उत्तरीखण्डया मर्मत यायेगु ज्या इलय्ब्यलय् न्ह्यानाच्वंगु खःसां भुखाचं क्षति जुइधुंकाः न्हापांगु खण्ड वंगु बैशाखनिसें ज्या शुरु यानाः वइगु फागुनतकया दुने सिधयेकेगु ठेक्का सम्झौता जूगु खः । थौंकन्हय् केशवनारायण चोकया प्रबलीकरण यायेगु ज्या जुयाच्वंगुलिं अन च्वंगु संग्रहालययात अस्थायी रुपय् मेगु भवनय् तयातःगु दु ।
LEAVE YOUR COMMENTS