सम्पदाप्रति स्थानीयं चिउताः प्वंकल

फास्ट ट्राय्कया रुटय् संसदया निरीक्षण

येँ – येँ–निजगढ द्रुतमार्गया विस्तृत परियोजना रिपोर्ट (डीपीआर) थ्यंमथ्यं तयार जूगु दु । थ्वहे वइगु माघ १९ गते तक प्रारम्भिक रिपोर्ट तयार जुइगु व वयां लिपा सेनायात लःल्हाइगु खँ धाःगु दु । उगु रिपोर्टयात सेनां अध्ययन यानाः डीपीआर दयेकूगु कम्पनीयात छ्वःगु छवाः लिपा फाइनल डीपीआर तयार जुइगु खँ धाःगु दु ।

आयोजनाया बारे जानकारी कायेगु निंतिं प्रतिनिधि सभाया विकास व प्रविधि समितिया छगू पुचः फास्ट ट्राय्कया जिरो प्वाइन्ट खोनाया निरीक्षणय् वंगु खःसा उमित सेनां थ्व जानकारी बिउगु खः । डीपीआर दयेकेगु निंतिं असोज १६ गते कोरियाली कम्पनीलिसे सम्झौता जूगु खः ।

आयोजना दयेकेगु निंतिं आवश्यक जुइगु १५,०२९ रोपनी जग्गा मध्ये १०,५०० रोपनी जग्गा अधिग्रहण यायेगु ज्या क्वचायेधुंकूगु दु । सेनां क्वःछिनातःगु इलय् फास्ट ट्राय्क दयेकेगु ज्या क्वचायेकेगु निंतिं थौंकन्हय् डीपीआर मदयेक हे ज्या न्ह्याकाच्वंगु दु । सेनां आर्थिक दँ २०७८÷०७९ तकया दुने सरकारयात फास्ट ट्राय्क दयेकाः हस्तान्तरण हे यायेगु लक्ष्य तयाः ज्या यानाच्वंगु दु ।

सेनां थुगु आर्थिक दँय् बहुवार्षिक ठेक्का प्याकेज, कटिङ व फिलिङया ज्या क्वचायेकेगु आज्जु तयातःगु दु । अथेहे ताँ व सुरुङ मार्गया ज्या नं थुगु हे आर्थिक दँय् न्ह्याइगु खँ धाःगु दु । सेनां फास्ट ट्राय्कया ज्या तीव्र गतिं न्ह्याकाच्वंसां नं फास्ट ट्रायकया जिरो प्वाइन्ट गन जुइ धइगु खँ धाःसा आः तकं क्वःछी फयाच्वंगु मदु ।

सेनां खोनाय् जिरो प्वाइन्ट तयेगु धकाः तयारी यानाच्वंगु दुसा स्थानीय जनतां खोनायात जिरो प्वाइन्ट दयेकल धाःसा अनया सांस्कृतिक व पुरातात्विक महत्वं जाःगु थाय् नष्ट जुइ धासें उकिया विरोध यानाच्वंगु दु ।

जिरो प्वाइन्टय् अझं विवाद
खोनाया जिरो प्वाइन्ट गन जुइ धइगु खँय् जुयाच्वंगु विवादया बारे नं संसदीय समितियात सेनां ब्रिफिङ याःगु दु । प्रवेश विन्दुया रुपय् दुगु खोना व बुंगय् मुआब्जाया विषयसं स्थानीय जनतां विरोध यानाच्वंगुलिं ज्या न्ह्याके मफुगु खः ।

खोना क्षेत्रय् लाःगु यल महानगरपालिका–२२ वडाया वडाध्यक्ष महेन्द्र महर्जनं बुंगद्यःया गुथिया रुपय् दुगु जग्गा भोग चलन याना वयाच्वंपिं स्थानीय वासिन्दायात २५ प्रतिशत मुआब्जा बिउगुलिं गुनासो वःगु व परम्परा चले यायेगु निंतिं स्रोत मदइगु पाखे बिचाः यायेत समिति समक्ष इनाप यानादीगु खः ।

लिसें स्थानीय जनतां खोना व बुंगय् जक फास्ट ट्राय्क, बाहिरी चक्रपथ १३२ केभी प्रशारण लाइन, स्मार्ट सिटी व बागमति करिडोर थेंज्याःगु आयोजना दयेकेत्यंगुलिं विरोध यानागु धासें तर थःपिं फास्ट ट्रायक विरोधी मखु, सरकारं बिउगु मुआब्जा म्हो जूगुलिं उकियात अप्वयेकेमाः धकाः माग यानाच्वंगु खँ धाःगु दु । थुकिं यानाः अनया नेवाः सम्पदा नष्ट जुइगु खँय् नं स्थानीय जनतां चिउताः क्यनाच्वंगु दु ।

सम्बन्धित बुखँ

LEAVE YOUR COMMENTS