ने. सं. ११४६ चाैलागा चर्हे - मातातीर्थ चःह्रे

मल्लयात लःल्हात प्रेम–मोहन सिरपाः

येँ – उपन्यास–कार मल्ल के. सुन्दरयात थुगु दँया प्रेम–मोहन सिरपाः म्हिगः छगू समारोहया दथुइ लःल्हात । मूपाहां वाङ्मय शताब्दी पुरुष सत्यमोहन जोशीं ५० द्वः तकाया उगु सिरपाः लःल्हानादीगु खः । प्रेम–मोहन सिरपाः गुथिया वंशी डंगोलया सभापतित्वय् जूगु उगु ज्याझ्वलय् मथुरा साय्मिं सिरपाःया म्हसीका व प्रा. प्रेमशान्ति तुलाधरं उपन्यासकार मल्लया म्हसीका बियादीगु खः ।

भाजु मल्लयात वय्कःया उपन्यास ‘द पोष्टर’ या लागिं थ्व सिरपाः बिउगु खः । ज्याझ्वलय् कवि स्नेह साय्मिं उगु उपन्यासयात खस नेपाली भासं अनुवाद यानाच्वनागु जानकारी बियादीगु खः । मूपाहां जोशीं आः थुकियात अंग्रेजीं नं पिकायेमाःगु बिचाः तयादिल ।