‘संविधान हे भंग जुइगु खतरा दु’

येँ- पुलांम्ह सभामुख व संविधानविद् दमननाथ ढुंगानां संविधान हे खतराय् लानाच्वंगु खँ धयादीगु दु । बिबिसीलिसे खँ ल्हायेगु झ्वलय् वय्कलं थौंकन्हय् राज्यया प्रमुख अङ्गतय् दथुइ हे संस्थागत द्वन्द्व तच्वा वयाच्वंगुलिं संविधान भङ्ग जुइगु खतरा अप्वया वयाच्वंगु खँ धयादीगु खः ।

‘सकलें सकसिगुं लिसे ल्वानाच्वंगु दु, राज्यया प्रमुख अङ्गतय् दथुइ संस्थागत द्वन्द्व तच्वयाच्वंगु दु, थज्याःगु अवस्थाय् संविधान हे भङ्ग जुइगु खतरा नं अप्वया च्वंगु दु’ वय्कलं धयादीगु दु ।

देय्या राजनीतिक परिदृश्य थौंकन्हय् राज्यया प्रमुख अङ्त जुयाच्वंपिं राष्ट्रपति, उपराष्ट्रपति, प्रधानमन्त्री, प्रधानन्यायाधीश, सभामुख, राष्ट्रिय सभाया अध्यक्ष दथुइ हे द्वन्द्व खने दयाच्वंगु दु । थुकिया लिपांगु उदाहरण प्रतिनिधि सभाया सभामुख अग्नि सापकोटां संवैधानिक परिषद्या नियुक्तीयात कयाः सर्वोच्च अदालतय् तःगु मुद्दा जुयाबिउगु दु । सभामुख सापकोटां तःगु मुद्दा धयागु सर्वोच्च अदालतया प्रधानन्यायाधीश हे पदेन दुजः दुगु संवैधानिक परिषद्ं याःगु निर्णय विरुद्ध प्रधानन्यायाधीशं हे नेतृत्व यानाच्वंगु सर्वोच्च अदालतय् लाःगु मुद्दा खः ।

मेख सभामुख प्रधानमन्त्रीं संसद् विघटन यायेधुंकाः दयेकूगु न्हूगु मन्त्रिमण्डलया शपथ ग्रहणय् धाःसा उपस्थित जुयादिल, तर संवैधानिक परिषद्या पदाधिकारीतय् शपथ ग्रहणय् उपस्थित जुयामदी। अथेहे उपराष्ट्रपति नन्दबहादुर पुन नं शपथ ग्रहणय् उपस्थित जुयामदी । थुकिं राज्यया प्रमुख अङ्तय् दथुइ हे द्वन्द्व तच्वया वयाच्वंगु क्यनाच्वंगु दु । थथे राज्यया प्रमुख अङ्गत हे मिले मजुइवं संविधान हे प्रहरी जुइगु अवस्था वयेफुगु विश्लेषण पूर्वसभामुख ढुंगानाया दु । वय्कःया कथं राज्यया प्रमुख अङ्तय् दथुइ हे वं वयात मुद्दा तयेगु, वं वयात मुद्दा तयेगु, छगुलिं मेगु संस्थाया विरोध यायेगु, मेगुलिं मेगु संस्थाया विरोध यायेगु ज्यां संविधानय् हे कडा प्रहार जुयाच्वंगु दु । वय्कलं धयादी, ‘आः जुयाच्वंगु घटनाया निचोड छु धाःसां संविधानयात हे कडा प्रहार जुयाच्वंगु दु, संविधान बचे यायेत आः तसकं थाकुयाच्वंगु दु ।’

वय्कलं प्रतिनिधि सभा पुनस्र्थापना जूसां हे संविधान भंग जुइगु खतरा दनिगु खँ धयादीगु दु । ‘क्षति कम जक जुइगु खः, खतरा ला द हे दनि ।’

‘संविधान पुनस्र्थापना जुल धाःसा आम्पाएर सहितया कासा जुइगुलिं छुं भचा आशा यायेगु थाय् दु, तर आःया हे अवस्था जुल धाःसा एम्पायरविनाया मस्तय्सं म्हितीगु कासा थें जुइ, थ्व झत खतरनाक जुइ’ वय्कलं धयादीगु दु ।

सम्बन्धित बुखँ

LEAVE YOUR COMMENTS