बास्कोटा विरुद्ध विपक्षीत छप्पँ

येँ -निवर्तमान सञ्चारमन्त्री गोकुल बास्कोटाया अडियो प्रकरणय् थनिंनिसें विपक्षी पार्टीत छप्पँ जुयाः संसदय् विरोध यायेगु सहमति जूगु दु । प्रमुख प्रतिपक्षी दल नेपाली कांग्रेस, समाजवादी पार्टी व राष्ट्रिय जनता पार्टीया दथुइ संसदय् छगू हे सः थ्वयेकेगु सहमति जूगु खः ।
सिंहदरवारय् जूगु सहलहय् स्वंगू दलं मुद्दाया आधारय् सहकार्य यायेगु सहमति याःगु खः । थौं च्वनीगु संसदया बैठकय् फुक्कं दलयात न्ववाकेगु कथं रणनीति दयेकूगु खँ धाःगु दु । यदि स्वंगू विपक्षी दलयात सदनय् थःगु खँ तयेगु अनुमति सभामुखं मबिल धाःसा संसद अवरुद्ध यायेत तयारी जुयाच्वंगु दु ।

थ्वहे झ्वलय् सीदु कथं प्रधानमन्त्री केपी शर्मा ओली व पुलांम्ह सूचना तथा सञ्चार मन्त्रीया विरोधय् अख्तियार दुरुपयोग अनुसन्धान आयोगय् प्यंगू उजुरी दर्ता जूगु दु । उजुरीइ प्रधानमन्त्री लिसे सञ्चारमन्त्री व पुलांपिं मुख्य सचिव व कानुन सचिवयात नं प्रतिवादी दयेकेमाःगु माग यानातःगु दु ।