यल मनपापाखें थीथी स्वंगू समिति गठन
यल – यल महानगरपालिकां अप्वया वनाच्वंगु ट्राफिक व्यवस्थापनया निंतिं समिति गठन याःगु दु । यल महानगरपालिकाय् च्वंगु बैठकं समिति गठन यायेगु निर्णय याःगु खः ।समुदाय प्रहरी साझेदारी ज्याझ्वः अन्तर्गत महानगरपालिकाय् च्वंगु बैठकं यल महानगरपालिका लागाया ट्राफिक व्यवस्थापन, सतक मस्त व मिसातयगु समस्या समाधानलिसें लागू वासः व अपराध न्यूनीकरण यायेगु ल्याखं उकथंया समिति गठन याःगु खः ।
थीथी विषयय् बिस्कं बिस्कं समिति गठन याःगुलिइ ट्राफिक प्रहरी निरीक्षक राजेश सिलवालया संयोजकत्वय् ट्राफिक व्यवस्थापन समिति, मिसा विकास अधिकृत महेश्वरी विष्टया संयोजकत्वय् मिसा व मस्तय् समस्या समाधान समिति व दीपु जोशीया संयोजकत्वय् लागू वासः व अपराध नियन्त्रण समिति गठन याःगु खः ।
बैठकय् नवासें यल महानगरपालिकाया प्रमुख चिरिबाबु महर्जनं स्वंगुलिं समितिं प्रत्यक्ष रुपं जनताया प्रभाव लाइकथं ज्या याइगु विश्वास प्वंकादिल । वय्कलं अप्वया वनाच्वंगु सवारी चापया तुलनाय् सतकया क्षमता तसकं म्हो जूगुलिं ट्राफिक व्यवस्थापन यायेगु ज्या थौंया इलय् सहरी लागाय् तःधंगु हाथ्या जुयाच्वंगु धासें सकसिनं थुगु समस्या समाधान यायेगु ज्याय् ग्वाहालि यायेमाः धयादिल ।
उपप्रमखु गीता सत्यालं महानगरपालिका मिसा, मस्त व ज्येष्ठ नागरिकतय् समस्याप्रति न्ह्याबलें गम्भिर व संवेदनशील जुयाच्वंगु दु धासें सार्वजनिक यातायातया क्षेत्रय् मिसा, मस्त व ज्येष्ठ नागरिकं गुगु समस्या फयेमालाच्वंगु खः, उकिया समाधान यायेत ट्राफिक प्रहरीलिसे सहकार्य यानाः ज्या यायेमाःगु आवश्यक जू धयादिल । बैठकय् समुदाय प्रहरी साझेदारी ज्याझ्वः अन्तर्गत वंगु कात्तिकनिसें आतकया दुने जूगु थीथी गतिविधि व ज्याझ्वःया बारे नं जानकारी बिउगु खः ।
LEAVE YOUR COMMENTS