अस्पताल क्षेत्र नो स्मोकिङ
छु छिं सुर्तीजन्य पदार्थया प्रयोग यायेगु यानादी ला ? गनं छिं येँया अस्पताल परिसर दुने वा पिने सुर्तीजन्य पदार्थया प्रयोग वा न्याये–मीगु जकं यानाच्वनादीगु मदुला ? यदि अथे खःसा आः सावधान जुयादिसँ । यदि छिं थथे यानाच्वनादीगु दुसा आः छितः प्रहरी कारवाही जुइ । ऐनय् जुयाच्वंगु व्यवस्थाकथं येँया ततःधंगु झिंछगू सरकारी अस्पतालय् आवंनिसें सुर्तीजन्य पदार्थया प्रयोग व विक्री वितरणय् रोक लगे याःगु दु ।
सुर्तीजन्य पदार्थ (नियन्त्रण व नियमन) ऐन–२०६८ लय् व्यवस्था यानातःसां व्यावहारिक रुपय् लागू जुइ मफयाच्वंगुलिं महानगरीय प्रहरी परिसर येँया सक्रियताय् न्हापांगु चरणय् येँया ततःधंगु ११ गू अस्पतालय कार्यान्वयन यायेकथं थ्व अभियान संचालन यायेत्यंगु खः । थ्व झ्वलय् न्हू बानेश्वरय् च्वंगु निजामति अस्पतालपाखें उगु ज्या न्ह्याकागु परिसरया प्रमुख उत्तमराज सुवेदीं जानकारी बियादिल ।
वय्कःयाकथं न्हापांगु चरणय् केन्द्रीय अस्पताल वीर अस्पताललिसें महाराजगंजय् च्वंगु शिक्षण अस्पताल, कान्ति बाल अस्पताल, थापाथलीइ च्वंगु प्रसूती गृह, छाउनीया सैनिक अस्पताल, नेपाल प्रहरी अस्पताल, निजामति अस्पताल, शुक्रराज ट्रोपिकल अस्पताल, सहीद गंगालाल हृदयरोग उपचार केन्द्र, नेपाल आयुर्वेद अस्पताल, तिलगंगा आँखा अस्पताल व किपूया कीर्तिपुर अस्पतालय् सुर्तीजन्य पदार्थया प्रयोग निषेध याःगु खः ।
अस्पतालया १०० मिटर तक सुर्तीजन्य पदार्थ विक्री वितरण याये मदइगु तकं प्रहरीं न्ह्यथंगु दु । धुम्रपान व सुर्तीजन्य पदार्थ सेवनं मानव जीवनया आर्थिक, सामाजिक व सांस्कृति क्रियाकलापय् तकं नकारात्मक लिच्वः लाकी । सर्वसाधारण जनताया स्वास्थ्य, सुविधा व आर्थिहितया अभिवृद्धि यायेत वि.सं. २०६८ लय् सरकारं थ्व ऐन हःगु खः ।
धुम्रपान व सुर्ती सेवन यात धाःसा तुरन्त रोक लगे यायेगु, उकथं रोक लगे यानाः नं माने मजुल धाःसा वा तःक्वः तःक्वः धुम्रपान वा सुर्ती सेवन यात धाःसा वयात अज्याःगु सार्वजनिकस्थलं पितिना छ्वयेगु वा सछितका तक जरिवाना वा निगुलिं सजायया व्यवस्था दु ।
समुदाय–प्रहरी साझेदारी ज्याझ्वः अन्तर्गत अभियान संचालन यायेत्यनागु जानकारी बियादिसें परिसर प्रमुख सुवेदीं न्हापांगु चरणय् प्रचारप्रसार यायेगु व टेरे मयात धाःसा कारवाहीया दायराय् हयेगु जुइ धयादिल । अस्पतालय् लागू जूसां नं मेमेगु क्षेत्रय् धाःसा छसिकथं अभियान न्ह्याकी ।
सार्वजनिक थाय्, सरकारी ज्याकू, अस्पताल, उद्योग, कलकारखाना, शिक्षण संघसंस्था, विमानस्थल, होटल, सिनेमा हल लगायतया क्षेत्रय् सुर्तीजन्य पदार्थ प्रयोग याये मदु । मेमेपिं मनूतय्त तकं लिच्वः लाइकथं छेँ वा निजी सवारी साधन दुने तकं धुम्रपान याये मजिउगु ऐनय् धयातःगु दु ।
प्रयोगकर्तायात जक मखसे समाजयात हे लिच्वः लाइगु जूगुलिं सुर्तीजन्य पदार्थ (नियन्त्रण व नियमन) ऐन २०६८ ऐन कार्यान्वयनया निंतिं अभियान हे संचालन यायेत्यनागु परिसरया प्रहरी नायक उपरीक्षक राजेन्द्र पोखरेलं जानकारी बियादिल ।
ऐन कार्यान्वयनया निंतिं अस्पताल, सामुदायिक प्रहरी सेवा केन्द्र, स्थानीय तह, स्वास्थ्य संस्था, सामाजिक संघसंस्था, संचारमाध्यम, नागरिक समूहलिसे समन्वय यानाः हरेक अस्पतालय् छगू समिति नं दयेकूगु दु । न्हापांगु चरणय् प्रचारप्रसारयात तीव्रता बीगु, सूचना टाँस यायेगु, अस्पताल लिक्क लाःगु होटलय् सुर्तीजन्य पदार्थ चिइके बीगु व वयां लिपा नं विक्री वितरण वा प्रयोग याःगु लुत धाःसा कारवाही प्रक्रिया न्ह्याकी ।
LEAVE YOUR COMMENTS