न्यागू सम्पदा अलपत्र

येँ – थनिं स्वदँ न्ह्यःया तःभुखाचं क्षतिजूगु न्यागू सम्पदास्थल पुनःनिर्माणया खँय् आतकं छुं निर्णय जुइ फयाच्वंगु मदु । तःभुखाय् ब्वःगु प्यदँ क्यनेत्यंगु इलय् तकं सम्पदा पुनःनिर्माण गबलय् जुइ धइगु खँय् छुं निश्चित जुइ फयाच्वंगु मदु ।

तःभुखाचं क्षति जूगु थनय खिचापुखुलिइ च्वंगु रणमुक्तेश्वर, तिंख्यः न्ह्यःने च्वंगु मांकाःद्यः, ख्वपया जंगम पीठ, थापाथलीइ च्वंगु कालमोचनघाटया जंगहिरण्य–नारायणया देगःलिक्कं च्वंगु सतः बसन्तपुलिइ च्वंगु कुमारि छेँया पुनःनिर्माण गबलय् निसें जुइगु खः निश्चित जूगु मदुनि ।

पुरातत्व विभागं थुपिं न्यागुलिं सम्पदास्थलया प्रारम्भिक अध्ययनया निंतिं गुथि संस्थानयात जिम्मा बियातःगु खः । विभागया स्वीकृति लिपा संस्थानं परामर्शदाता नियुक्त यानाः नक्सा तकं दयेकेधुंकूगु दु उपप्रशासक दीपकबहादुर पाण्डें कनादिल । परामर्शदाता नियुक्त यानाः नक्सा दयेकेत जक १२ गू लाख खर्च जूगु वय्कःया धापू दु ।

पुनःनिर्माणया निंतिं स्वीकृति मवःगुलिं सम्पदा पुनःनिर्माणया ज्या नं अलपत्रय् लाःवंगु वय्कलं धयादिल । पुनःनिर्माणया निंतिं थुपिं न्यागू सम्पदामध्ये रणमुक्तेश्वरया निंतिं झिंप्यंगू करोड ख्वीनिगू लाख नीप्यद्व, मांकाद्यःया देगःया निंतिं नीच्यागू लाख स्वीद्वः, जंगम पीठया निंतिं झिंस्वंगू करोड ग्वीनिगू लाख सतःया निंतिं झिंस्वंगू करोड व कुमारि छेँया निंतिं न्हय्गू करोड ख्वीच्यागू लागत तुइगु अनुमान याःगु खः ।

गुथि संस्थानं विभागया स्वीकृति कयाः नक्सा दयेकेगु ज्या क्वचायेकूगु जक मखसे विभागं नं उकियात पास यायेधुंकूसां पुनःनिर्माण व नियमितय् बजेट समावेश मयाःगुलिं ज्या न्ह्याये फयाच्वंगु पाण्डें कनादिल । उगु सम्पदास्थल दयेकेगु बारे छुं निर्णय मजूनिसां आःया निंतिं धाःसा तू जक नका तयेगु ज्या जुयाच्वंगु दु ।