फोन छगू वयेवं मुख्यमन्त्री हे हिल

येँ (नेपालभाषा टाइम्स)- लुम्बिनी प्रदेशया मुख्यमन्त्री पदय् नाटकीय हिउपाः वःगु दु । अन मुख्यमन्त्री जुइम्ह धकाः एमालेपाखें संसदीय दलया नेता लीला गिरीया नां वयाच्वंगु खःसां अन्तिमय् उपनेता चेतनारायण आचार्ययात मुख्यमन्त्री दयेकेगु ज्या जुल । आचार्यं कांग्रेसया समर्थनय् म्हिगः ५६ म्ह सांसदया हस्ताक्षर सहित मुख्यमन्त्री दाबी यानादीगु खःसा म्हिगः हे वय्कःयात मुख्यमन्त्री नियुक्त याःगु खः ।

गिरी सांसदतय् नां संकलन लानाः दावी याः वनेत ठिक्क जुयाच्वंगु इलय् येँनं महासचिव शंकर पोखरेलं फोन यानाः गिरीया थासय् आचार्ययात मुख्यमन्त्री दयेकि धकाः निर्देशन बियाहःगु खँ धाःगु दु । अन्तिमय् नां हिलेगु ज्या याःगुलिं लुम्बिनीया एमाले कार्यकर्तात रुष्ट जुयाच्वंगु दु ।

मेखे बागमती प्रदेशय् कांग्रेस व एमाले दथुइ मन्त्रालयया भागबण्डा मिले मजुयाः म्हिगः मुख्यमन्त्री दाबी यायेगु ज्या मजुल । अन कांग्रेस संसदीय दलया नेता बहादुर सिंह लामाया नेतृत्वय् सरकार गठनया तयारी जुयाच्वंगु दु । एमालें न्हय्गू मन्त्रालय माग याःगुली कांग्रेसं खुगू जक बीगु धायेवं खँ मिले मजूगु खः ।