डा. बालगोपालया सम्पदा संरक्षण सम्बन्धी सफू

येँ(नेपालभाषा टाइम्स)÷ भाषासेवी लिसें साहित्यकार डा. बालगोपाल श्रेष्ठया सम्पदा संरक्षण व अधिकार सम्बन्धी सफू पिदंगु दु । डा. श्रेष्ठया ‘हेरिटेज प्रिजर्भेसन एण्ड राइट्स इन नेपाल’ नांया सफू भर्चुअल माध्यमं जूगु छगू ज्याझ्वःया दथुइ पितब्वज्या याःगु खः ।

वंगु असारया निगूगु वाःपाखे वल्र्ड नेवाः अर्गनाइजेसन (डब्लुएनओ)पाखें न्हियान्हिथं न्ह्याका वयाच्वंगु डब्लुएनओ डेल्ली ब्रोडकास्ट (डब्लुडीबी) ज्याझ्वलय् वय्कःया उगु सफू पितब्वज्या याःगु खः । मूपाहांकथं झायादीम्ह बेलायतया अक्सफोर्ड विश्वविद्यालयया प्रोफेसर डा. डेभिड गेल्नरं सफू पितब्वज्या यानादिसें डा. श्रेष्ठया सफू पितब्वज्या याये खंगुलिं लसता प्वंकादीगु खः । लिसें वय्कलं सफूयात कयाः चर्चा यानादिसें च्वमि डा. श्रेष्ठ ताःई न्ह्यःनिसें अनुसन्धानय् लगे जुयाच्वंगु धइगु खँ थः जानकार जूगु धासें वय्कःलिसे नापं च्वनाः ज्या नं याये खंगुलिं वय्कःया लेखनशैलीयात थम्हं सतिकं दुवालेगु ह्वःताः नं चूलाःगु खँ कनादिल ।

डब्लुएनओया नायः संयुक्त श्रेष्ठं सफूया समीक्षा यानादिसें पितब्वज्या जूगु सफुतिइ च्वमि डा. श्रेष्ठं थीथी इलय् पिथनादीगु अनुसन्धानात्मक च्वसुत छथाय् हयाः सफूया आकार बियादीगु च्वछायेबहजू धयादिल । सफुतिइ नेपाःया भाषिक, जातीय अधिकार प्राप्तिया निंतिं जूगु आन्दोलन, नेपाःया राजनीतिक इतिहासलिसें नेवाः समुदाय दुने प्रचलित संस्कार, धर्म, रीतिथिति, व मिथक अथे हे नेपाल संवत्या आन्दोलन आदि बारे नं खोज अनुसन्धान याइपिनिगु निंतिं सफू सहयोगी जुइगु विश्वास प्वंकादिल ।

वज्र पब्लिकेशन प्रा.लि.या विदुर डंगोलं डा. श्रेष्ठं उगु सफू थःपिंत पिथनेगु भाला बिउगुलिं लसता प्वंकादिसें सफुतिइ दुथ्याका तःगु विषयं थःत नुगलय् थिउगु खँ कनादिल ।
ज्याझ्वलय् च्वमि डा. श्रेष्ठं सफूयात कयाः सहभागिपिंसं तयादीगु न्ह्यसःया लिसः बियादीगु खः ।