प्यंगू देय् स्वाइगु बस बंगलादेशं न्ह्यात

येँ – स्वंगू देय्या ३० म्ह सरकारी अधिकारी सहित निगः गाडी बंगलादेशं नेपाःपाखे न्ह्याःगु दु । बंगलादेश, भुटान, भारत व नेपाः (बीबीआइएन) यातायात सम्झौता कथं सोमवाः सुथय् त्रिदेशीय अन्तर्राष्ट्रिय बस सेवा परीक्षण कथं उगु बस नेपाःपाखे वःगु खः । प्यंगू देय् दथुइ सम्झौता जूगु स्वदँ लिपा परीक्षण यातायात न्ह्याःगु खः ।

दक्षिण एशियाली देय्यात यातायात कनेक्टिभिटी स्वयेत रुट सर्भे व सवारी परीक्षणका झ्वलय् निगः बस ढाकां नेपाःपाखे वःगु भौतिक पूर्वाधार तथा यातायात मन्त्रालयया सिनियर डिभिजन इन्जिनीयर विनोद भट्टराई नं कनादीगु दु । वय्कःया लिसें थीथी मन्त्रालयया खुम्ह नेपाली अधिकारी बंगलादेशं नेपाःपाखे वःगु बसय् यात्रा यानादीगु खँ नं वय्कलं कनादीगु दु ।

ढाकां नेपाःपाखे वःगु बस म्हिगः सोमवाः बंगलादेश व भारतया सीमा नाका रंगपुर शहरय् च्वंगु खः । थौं रंगपुर न्ह्याःवनाः भारतया सिलगुडीइ थ्यनिसां बुधवाः नेपाःया भरतपुर थ्यनीगु खँ धाःगु दु । बिहीवाः कुन्हु स्वंगू देय्या पाहांपिंत भौतिक पूर्वाधार लिसें यातायात मन्त्रालयया सचिव मधुसुदन अधिकारीं काभ्रेया धौख्यलय् लसकुस यायेगु ज्याझ्वः तयातःगु दु ।

बीबीआइन भेहिकल सम्झौता २०१५ सं जूगु खः । तर भुटानया च्वय्या सदनं उगु सम्झौतायात अनुमोदन मयाःगुलिं रुट सर्भे व परीक्षणया झ्वलय् भुटानं ब्वति मकाः । नेपाःया मन्त्रिपरिषदं लेटर अफ एक्सचेन्ज अनुमोदन यात धाःसा खुलाया दुने प्यंगू देय् दथुइ बस सेवा सञ्चालन जुइगु खँ धाःगु दु ।

वातावरण अनुकुल बसय् वाइफाइया लिसें फुक्कं कथंया अन्तर्राष्ट्रिय मापदण्ड कथंया सुविधा दइगु खँ धाःगु दु । बसाय रुट ढाका–बंगलाबन्धु–सिलगुडी–काँकडभिट्टा जुयाः येँ थ्यनिगु खँ धाःगु दु । ढाकां न्ह्याःगु बस येँ थ्यनिबलय् थ्यंमथ्यं १२ सय किलोमिटर दुरी पार याइगु खँ धाःगु दु ।

येँ क्वचाःगु झिंच्याक्वःगु सार्क सम्मेलनया झ्वलय् भारतं सार्क मुलुकयात छगू देशं मेगु देय् लिसे यातायात स्वायेगु निंतिं च्यागुलिं देशय् बस चले यायेगु प्रस्ताव तःगु खः । तर पाकिस्तानं उकियात अस्वीकार यायेवं प्यंगू देय् नेपाः, भारत, भुटान व बंगलादेश दथुइ यातायात सम्झौता जूगु खः ।

थुगु रुटय् नियमित बस सेवा सञ्चालन जुल धाःसा नेपालं पूर्व भारत जुयाः ढाका व भुटान वनेगु निंतिं हवाइ मार्गया आवश्यकता मजुइगु खँ धाःगु दु । उगु रुटय् चले जुइगु बसया भाडा व मेगु विषयसं धाःसा निर्णय यायेगु ल्यँ दनिगु खँ धाःगु दु । न्हापांगु पटक स्वंगः बसं सेवा न्ह्याकेगु खँ धाःगु दु । प्यंगुलिं देशं बराबरी ल्याखय् बस चले याइगु खँ धाःगु दु ।

भौतिक पूर्वाधर लिसें यातायात मन्त्रालयया सहसचिव केशव शर्माया कथं थ्व न्हापांगु प्राविधिक परीक्षण खः । वय्कःया कथं ‘ट्रायल रन’ या आधारय् रुट परीक्षण जुइ । वयां लिपा भन्सार, अध्यागमन लगायतया प्रक्रिया पूवां नियमित बस सञ्चालन यायेत खुलाया ई काइगु खँ नं वय्कलं कनादीगु दु ।वातावरण अनुकुल बसय् वाइफाइया लिसें फुक्कं कथंया अन्तर्राष्ट्रिय मापदण्ड कथंया सुविधा दइगु खँ धाःगु दु ।

सम्बन्धित बुखँ

LEAVE YOUR COMMENTS