‘जन्मस्थलया विवाद मदु’

येँय् बुद्धया बुद्धया अस्थिधातु चाःहीकल
येँ – प्रधानमन्त्री केपी ओलीं बुद्ध बूगु थाय्या बारे आः विवाद व बहस यानाच्वनेमाःगु आवश्यक मदु धयादीगु दु । २५६२ क्वःगु स्वांयाः पुन्हिया लसताय् म्हिगः लुम्बिनीइ जूगु ज्याझ्वलय् न्ववासें वय्कलं थ्व खँ धयादीगु दु । लुम्बिनी विकास कोषया ग्वसालय् जूगु ज्याझ्वलय् न्ववासें वय्कलं धयादिल, ‘बुद्ध गन बूगु धयागु बारे मनूतय्सं छाय् भ्रम न्यंकाच्वंगु ?

जबकि भारतया सम्राट अशोकं हे अशोक स्तम्भ दयेकाः बुद्ध नेपालय् बूगु धकाः धया वनेधुंकूगु दु ।’बुद्धजयन्तीया लसताय् म्हिगः लुम्बिनी थीथी जातिया सांस्कृतिक झाँकी सहित ज्याझ्वः याःगु खः । ज्याझ्वलय् राष्ट्रपति विद्यादेवी भण्डारी नं सहभागी जुयादीगु खः । लुम्बिनीइ दयेकेत्यंगु मेगु अन्तर्राष्ट्रिय सम्मेलन केन्द्रया उलेज्या नं म्हिगः राष्ट्रपति भण्डारीं हे यानादिल । ४० करोड तका तूगु थ्व हलय् न्याद्वः मनू च्वनेगु थाय् दइ ।

थ्व हल दयेकीगु थाय्या नापसं हे सेनां ४ करोड खर्च यानाः मेगु अस्थायी हल दयेकूगुलिं अन विवाद जूगु खः । थ्व न्हूगु हल दयेके सिधयेवं अस्थायी हल थुना छ्वइ धाःगु दु । म्हिगः येँय् नं बुद्धजयन्ती समारोह समितिया ग्वसालय् आनन्दकुटी विद्यापीठय् मूल समारोह हनेगु लिसें बुद्धया अस्थिधातु नगर परिक्रमा यायेगु ज्या जुल । उकथं हे यलय् जूगु बुद्धजयन्ती ज्याझ्वलय् न्ववासें यल मनपाया मेयर चिरिबाबु महर्जनं नेपाःस्थित राष्ट्र संघया ज्याकुथी बुद्धया मूर्ति तयेमाःगु बिचाः प्वंकादिल ।