डेंगु पनेत येँय् वासः छ्वाकेगु शुरु

येँ – यँे महानगरपालिका दुने डेंगुया प्रकोप अप्वया वनेवं येँ महानगरपालिकां उकियात नियन्त्रण यायेगु निंतिं थीथी थासय् वासः छ्वाकेगुया निसें जनचेतना अप्वयेकेगु ज्या यानाच्वंगु जानकारी येँमनपाया प्रवक्ता ईश्वरमान डंगोलं ‘नेपालभाषा टाइम्स’ यात कनादीगु दु ।
वय्कलं बियादीगु जानकारी कथं येँमनपाया १५, १६, १७, १८ व २६ वडाया खुसि सिथय् वासः छ्वाकेगु ज्या न्ह्यानाच्वंगु दु ।

अथे हे येँ मनपाया फुक्कं वडाय् स्वयम् सेवक खटे यानाः माइकिङ यायेगु लिसें डेंगु ल्वय् पाखें सुरक्षित जुइगु निंतिं सचेतना ज्याझ्वः न्ह्याकाच्वनागु जानकारी नं वय्कलं बियादिल । अभियान गबले तक न्ह्याइ धइगु न्ह्यसःया लिसः बियादिसें वय्कलं ल्वय् नियन्त्रण मजूतले अभियान न्ह्याकेगु खँ कनादिल ।

येँ जक गुलि मनूत संक्रमित जूगु धइगु न्ह्यसःया लिसः बियादिसें डंगोलं येँ मनपा दुने जक झिम्हति संक्रमित जूगु व उकी मध्ये च्याम्हति वासः यानाः छेँय् लिहां वनेधुंकूगु जानकारी नं बियादीगु दु । डेंगु भाइरस नियन्त्रण यायेगु निंतिं म्हिगः टेबहालय् नं वासः ह्वलेगु ज्या जूगु दु ।

वडाध्यक्ष चीनकाजी महर्जनया पहलय् म्हिगः वासः छ्वाकेगु ज्या जूगु खः । तेबहाः देगःया लिसें थीथी थासय् डेंगु नियन्त्रण यायेगु निंतिं वासः छ्वाकेगु ज्या जूगु खँ नं महर्जनं कनादीगु दु । छेँय् कःसिइ लः मुंकेत नं इनाप याःगु दु ।