कांग्रेसं छायाँ सरकार दयेकीगु

येँ – सरकारं यानाच्वंगु ज्यायात सतिकं च्वनाः निगरानी तयेगु लागिं प्रमुख प्रतिपक्षी नेपाली कांग्रेस आः छाया सरकार गठन यानाः न्ह्याः वनेगु तयारीपाखे लगे जूगु दु ।म्हिगः च्वंगु पार्टीया संसदीय दलया बैठकं छायाँ सरकार गठन यायेगु निर्णयया नापनापं सु सु च्वने न्ह्याः मन्त्रालय समेत खुले यानाः नां बीत इनाप याःगु खः ।

कांग्रेसं छायाँ सरकार गठन यायेगु निर्णय न्हापा हे याःगु खःसां कार्यान्वयन जक आः यायेत्यंगु खः । कांग्र्रेसं दयेकीगु थ्व छायाँ सरकारय् छम्ह सांसदं स्वंगू तक इच्छुक मन्त्रालयया नां बी फइगु खँ धाःगु दु । संसदीय दलपाखें उकी मध्ये छगू मन्त्रालय स्वयेगु जिम्मा बी ।
सरकारयात प्रत्यक्ष निगरानी तयेगु लागिं बेलायतय् थज्याःगु छायाँ सरकार (स्याडो गभर्मेन्ट) दयेकीगु चलन दु ।

छुं जुयाः चालु सरकार क्वःदल धाःसा तुरुन्त सरकार कःघायेमाः धकाः छायाँ सरकार दयेकीगु खः । नेपालय् नं बहुदलीय व्यवस्था पुनस्र्थापना जुइवं गिरिजाप्रसाद कोइरालां सरकार गठन याःगु खःसा तत्कालीन प्रमुख प्रतिपक्षी नेकपा (एमालें) मनमोहन अधिकारीया नेतृत्वय् छायाँ सरकार गठन याःगु खः ।

अनुभवी सांसदयात छगू छगू मन्त्रालय स्वयेगु जिम्मा बिसें छायाँ मन्त्री दयेकीगु थ्व चलनय् सम्बद्ध छायाँ मन्त्रीं थःत जिम्मा बिउगु मन्त्रालयया सम्पूर्ण जानकारी थःके तयाः उकिया विषयय् सरकारयात सुझाव व आलोचना याइगु खः ।

नेपाली कांग्रेस दुने सभापति शेर बहादुर देउवाया विरोधी नेतातय्सं धाःसा छायाँ सरकारया नं विरोध याना हःगु खँ सीदुगु दु । कांग्रेसं प्रमुख प्रतिपक्षीया भूमिका हे बांलाक म्हिते मफुगु जुयाः थ्व सरकारं नं ज्या याये मफइगु खँ रामचन्द्र पौडेल पक्षधर नेतातय्सं धायेगु याना हःगु दु ।