ने. सं. ११४४ कौलाथ्व चौथी -

‘भाषा कानुन थाकुसां लागू जुइ’

येँ (नेपालभाषा टाइम्स)- बागमती प्रदेशया संस्कृति मन्त्री शैलेन्द्रमान वज्राचार्यं बागमती प्रदेश सरकारं भाषा सम्बन्धी कानुन पारित यानाः नेपालभाषा व तामाङ भाषायात सरकारी ज्याखँया भाषा कथं मान्यता बिउसां नं उगु कानुन कार्यान्वयन यायेगु सवालय् धाःसा आपालं समस्यात दनिगु जुयाः आः सकलें छप्पँ जुयाः न्ह्याये माःगु अवस्था दु धयादीगु दु ।

म्हिगः भाषा आयोगया ज्याकुथिइ वय्कःयात याःगु हना ज्याझ्वलय् न्ववासें वय्कलं उगु खँ कनादीगु खः । बागमती प्रदेशय् उगु कानुन पारित याकेत भाषा आयोगं याःगु सिफारिसया लागिं सुभाय् देछासें वय्कलं आः कानुन कार्यान्वयन याकेत नं आयोगपाखें उतिकं ग्वाहालि याये मानिगु खँ कनादिल ।

ज्याझ्वलय् वय्कःयात हनापौ लःल्हासें भाषा आयोगया नायः डा. गोपाल ठाकुरं आयोगया सिफारिसयात न्हापांखुसी कार्यान्वयन याःगुलिं मन्त्री वज्राचार्ययात सुभाय् देछानादिल । लिसें आः वय्कःया हे कार्यकालय् बागमती प्रदेशय् नं भाषा आयोगया शाखा चायेकेगु ज्या जूसा बांलाइ धकाः सुझाव नं बियादिल ।

अथे हे आयोगया दुजः सुरेश मानन्धरं मन्त्री वज्राचार्ययात आयोगया ज्याकुथिइ लसकुस यासें बागमती प्रदेशं भाषाया कानुन कार्यान्वयन याःगुलिं देशय् वःगु संघीय व्यवस्थाया उपलब्धी खनेदुगु चर्चा यानादिल ।

आयोगया कामु सचिव डा. लोक बहादुर लोप्चनं भाषा कानुन तयार यायेत आयोगपाखें याःगु ज्याखँया बारे जानकारी यासें बागमती प्रदेशय् भाषा आयोगया शाखा चायेकाः प्रतिष्ठानया ज्या समेत थ्वहे ज्याकुथिं याःसा बांलाइगु सुझाव बियादिल ।

आयोगया ज्याकुथिं धाःकथं मन्त्री वज्राचार्य आयोगया ज्याकुथिइ प्रवेश यानादीम्ह न्हापांम्ह मन्त्री खः । भाषा आयोग गठन जूगु न्हय्दँ फुनाः च्यादँय् क्यनाच्वंगु दु ।