ख्वनाय् प्रहरी लिचिल

ख्वना – ख्वनाया खुदोलय् म्हिगः शान्तिपूर्ण रुपं वा पीगु ज्या जूगु खः । म्हिगः सुथय् १० बजे तक वा पीगु थासय् प्रहरी च्वनाच्वंगु खःसा स्वनिगःया थीथी थासं आपालं मनूत वा पीगु थासय् मुंवयेवं प्रहरी अनं चिलावंगु जानकारी खोकना जनसरोकार समितिया अध्यक्ष नेपाल डंगोलं बियादीगु दु ।

म्हिगः नं प्रहरीं दमन यानाः वा पीके मबीगु रणनीति ज्वंगु खः । प्रहरीं तौदह व भैंसेपाटीइ हे न्यासि वनाः खुदोल पाखे वनाच्वंपिंत पनेगु कुतः याःगु खः । तर सर्वसाधारण जनताया ल्याः अप्वया वयेवं प्रहरी चिलावंगु खः ।

वय्कःया कथं वा पीगु निंतिं वंगु शुक्रवाः हे प्रमुख जिल्ला अधिकारीलिसे सहलह जूगु खःसा उबलय् सिडिओं नं गुगुं नं हालतय् वा पीकेमखु धाःगु खः । स्थानीय वासिन्दातलिसे खँल्हायेगु झ्वलय् प्रमुख जिल्ला अधिकारीं न्ह्याक्व प्रहरी परिचालन यायेमाःसां वा पीगु ज्याय् हस्तक्षेप यायेगु ख्याच्वः बिउगु खः । तर ख्वनाया जनताया समर्थनय् द्वलंद्वः मनूत खुद्वलय् थ्यंबलय् वाः पीपिं थ्यंकः वये न्ह्यव हे प्रहरी लिहां वंगु खः ।

अध्यक्ष डंगोलं म्हिगः जक च्यापी स्वयां अप्वः जग्गाय् वा पीगु ज्या जूगु जानकारी बियादिसें आः हाकनं न्हिथं वा पीगु ज्या न्ह्याकेगु जानकारी बियादीगु दु । यदि वा पीगु झ्वलय् प्रहरीं हाकनं दमन यायेत स्वल वा वा पीके मबिल धाःसा हाकनं वा पीगु निंतिं स्वनिगःवासीपिंत आह्वान यायेगु खँ कनादिल । थ्वयां न्ह्यः शनिवाः वाः पीगु झ्वलय् धाःसा प्रहरीं अश्रुग्या कयेकाः लाठीचार्ज यानाः दमन याःगु खः ।