सैन्य सम्झौताया प्रस्तावं तरंग

येँ – नेपाः भ्रमणय् वयाच्वंम्ह अमेरिकी सैनिक अधिकारीं नेपाःलिसे सैन्य सम्झौता यायेगु धकाः तःगु प्रस्तावयात कयाः देय्या वामपन्थी नेतातय् दथुइ हलचल पिहां वःगु दु ।

अमेरिकां तःगु उगु प्रस्तावयात नेपाली सेनां खास हे रुचि क्यंगु मदुसां उकी प्रधानमन्त्री शेरबहादुर देउवा धाःसा सकारात्मक जूगु खँ नं पिहां वःगु दु । अमेरिकी सेनाया अज्याःगु प्रस्तावबारे सहलह यायेत म्हिगः नेकपा (एकीकृत समाजवादी) या अध्यक्षलिसे माओवादी नेता नारायणकाजी श्रेष्ठं खँल्हाबल्हा यानादीगु सीदुगु दु । यदि थ्व प्रस्तावयात सरकारं एजेण्डाया रुपय् न्ह्यःने हल धाःसा उकिया प्रतिकार याये मालीगु खँ वय्कःपिनि दथुइ जूगु खँ धाःगु दु ।