महानगरं तछ्याःगु लँ सडक विभागं पीच यात

येँ (नेपालभाषा टाइम्स)- येँ महानगरपालिकां न्यूरोडया शुक्रपथय् तछ्याःगु लँ सोमवाः सडक विभागं ल्हानाः पीच यानाबिउगु दु । लँ पीच याःवःगु इलय् सतक तब्या यायेमाः धाइपिं व चिब्या यानाः फुटपाथ तब्या यायेमाः धाइपिं स्थानीयतय् दथुइ हे छझाः विवाद नं ब्वलंगु खः । विवाद ब्वलंसां सतक विभागं महानगरं म्हूगु लँय् पीच यानाथकूगु दु ।

महानगरं न्यान्हु न्ह्यव वंघः निसें विशालबजार तकया सतकया निखेरं पीच तछ्याःगु खः । थ्व थाय् येँ महानगरपालिका २४ वडा लाः । २४ वडाया जनप्रतिनिधित सतक चिब्या यानाः फुटपाथ तब्या याःसां जिउ धयागु पक्षय् दु । न्यूरोडया मू सतक लाःगु २२ वडाया जनप्रतिनिधित सतक चिब्या यायेमजिउ धयागु पक्षय् दु ।

डिभिजन सडक कार्यालयं महानगरं तछ्याःगु थासय् पीच याःवःबलय् नगर प्रहरी वयाः पनेत स्वःगु खः । नगर प्रहरीं डिभिजन सडक कार्यालयया कर्मचारीतय्त ख्यानाः पीच यानाच्वंगु ज्या दिकेत वयेवं स्थानीयतय्सं विरोध याःगु खः । थ्व हे झ्वलय् निथ्वः दथुइ विवाद ब्वलंगु खः । २४ वडाया जनप्रतिनिधितसहित छुं मनूतय्सं नं पीच याकेमबीत पं वःगु खः । विवाद तच्वया वयेवं प्रहरीं हस्तक्षेप यानाः सतक पीच याकूगु खः । सतक पीच यायेगु निंतिं सतक विभागं तःम्ह हे कर्मचारी छक्वलं खटे यानाः ज्या सिधयेकूगु खः ।

महानगरपालिकां सतक चिब्या यायेगु निंतिं लँ म्हुइवं डिभिजन सडक कार्यालय व येँ महानगरपालिका प्रमुख बालेन साह दथुइ विवाद ब्वलंगु खः । महानगरं तछ्याःगु पीच डिभिजन सडक कार्यालय काठमाडौं अन्तर्गत लाः । महानगरं थःपिंके स्वीकृति हे मकासे सतक तछ्याःगु धासें डिभिजन सडक कार्यालयं निन्हुया दुने सतक पीच या, मखुसा कारवाही जुइ धकाः महानगरपालिकायात पौ छ्वःगु खः । तर महानगरपालिकां थःपिंसं सतक दयेकेमखु धायेवं डिभिजन सडक कार्यालयं हे लँ पीच याःगु खः ।

डिभिजन सडक कार्यालयया सूचना अधिकारी प्रमोद खतिवडां सतक तछ्यानातःगुलिं जनतायात सास्ती मजुइमा धकाः थःपिंसं हे पीच यानागु खँ धाःगु दु । ‘डिभिजन कार्यालयं सतक दयेकेत पौ छ्वयेधुंकाः महानगरया प्रतिनिधिपिं वयाः अनौपचारिक रुपं खँ ल्हाःवःगु खः, तर उमिसं मेमेगु थाय्या बारे सहलह ब्याकेफइ, न्यूरोडया सतक दयेकेफइमखु धाःगुलिं जिमिसं हे दयेकागु खः ।’
वय्कलं धाःगु दु ‘आः जनतायात सास्ती जुइ धकाः सतक निं दयेकेगु ज्या यानागु खः, नियमकथं महानगरपालिकायात कारवाही नं जुइ तिनि ।’