ने. सं. ११४४ कौलाथ्व तृतीया -

गुथियात कयाः नगर प्रमुख प्रजापतिलिसे अन्तक्र्रिया

ख्वप (नेपालभाषा टाइम्स)- ख्वप नगरपालिकाया प्रमुख सुनिल प्रजापतिलिसे बागीश्वरी कलेजया विद्यार्थीतय्सं गुथि विषययात कयाः अन्तक्र्रिया याःगु दु । कलेज व्यवस्थापन समितिया अध्यक्षतकं जुयाच्वनादीम्ह नगर प्रमुख प्रजापतिलिसे कलेजया स्नातक तह स्वंगूगु दँय् अध्ययनरत विद्यार्थीतय्सं ‘गुथि छगू सामाजिक संस्था’ विषयय् अन्तक्र्रिया याःगु खः ।

ज्याझ्वलय् नवासें नगर प्रमुख प्रजापतिं बेलायतया संविधानय् थें गुथिइ नं अलिखित नियम, कानून दुगु व थुकथंया नियम कानून गुथिया सकलें गुथ्याःतय् सहमतिइ जक आवश्यककथं सुधार व परिमार्जन याये फइगु खँ कनादिल । सामाजिक संस्थाया रुपय् स्थापना जुयाच्वंगु गुथिं थःथःगु गुथिइ आवद्ध जुयाच्वंपिं सामाजिक उद्देश्य पूर्ति यायेगु व संस्कृति, संस्कारयात निरन्तरता बिया वयाच्वंगु खँ कनादिल ।

थीथीकथंया गुथि दइगु बारे जानकारी बियादिसें ज्याझ्वलय् मूपाहांकथं झायादीम्ह वय्कलं सरकारी, निजी व राज गुथि यानाः स्वताजिकथंया गुथि दइगु व थुपिं गुथित समुदायया मेमेगु संघसंस्था स्वयां बिस्कंकथं संचालन जुइ धासें संचालन जुइगु तरिका बारे नं कनादीगु खः ।

गुथिं याइगु ज्याया बारे कनादिसें वय्कलंगुथिया ज्या धइगु समुदाय व गुथ्याः दथुइ सिकःबुकः, समाजया हित जुइगु समाजयात भिं यायेगु निंतिं ज्या याइ धासें परापूर्वकालनिसें चले जुया वयाच्वंगु, चलन, रहनसहन, नैतिक अनुशासन, परिवेशयात वर्तमान इलय् नं निरन्तरता बियाः न्हू पुस्तायात हस्तान्तरण याना वनेगु नापं सांस्कृतिक सम्पदात ल्यंकातयेगु तःधंगु जिम्मेवारीबोध यानाः गुथि संचालन जुया वयाच्वंगु दु धयादिल । वय्कलं गुथि सुं नं व्यक्ति विशेषया निंतिं फाइदा जुइगु ज्या याइमखु धासें गुथिया ज्या धइगु हे गुथ्याःतय् हितय् ज्या याइगु संस्थाकथं थुइकेमाः धयादिल ।

कलेजया विद्यार्थी सरला लवजुया सभापतित्वय् जूगु ज्याझ्वलय् विना वनमाला, रुपा धिमाल, प्रनिता अधिकारी, काजल थापा, गौरव लामिछाने लगायतया कलेजया विद्यार्थीतय्सं थःपिंसं अवलोकन यानागु सामुदायिक संस्था, धार्मिक स्थल, ब्वनेकुथि, अस्पतालया बारे प्रस्तुतीकरण बियादीगु खः ।