गद्दी बैठक व्यवस्थापनया निंतिं न्यागू बुँदाया समझदारी

येँ – बसन्तपुलिइ च्वंगु गद्दी बैठकया व्यवस्थापनया निंतिं निगू मन्त्रालयया दथुइ न्यागू बुँदाया समझदारी जूगु दु । बसन्तपूस्थित गद्दी बैठक व्यवस्थापन यायेत गृह व पर्यटन मन्त्रालय दथुइ न्यागू बुँदाय् समझदारी जूगु खः । गृहमन्त्री रामबहादुर थापाया उपस्थितिइ पर्यटन मन्त्रालयया सचिव केदारबहादुर अधिकारी व गृह सचिव प्रेमकुमार राईं समझदारी पत्रय् ल्हाःचिं तयादीगु खः ।

समझदारीकथं गद्दी बैठकय् दुगु आवश्यक सामग्रीया संरक्षण, प्रवद्र्धन लगायतया ज्या आवंलि संस्कृति, पर्यटन तथा नागरिक उड्डयन मन्त्रालयं याइगु जूगु दु । थ्व स्वयां न्ह्यः गद्दी बैठकया व्यवस्थापन गृह मन्त्रालयं याना वयाच्वंगु खः । गृहलिसे जूगु समझदारीकथं अनच्वंगु सामग्रीया संरक्षण व प्रवद्र्धनया ज्या आवंलि मन्त्रालयं यायेकथं हस्तान्तरण याःगु खः ।

निगू मन्त्तालय दथुइ जूगु समझदारीकथं गद्दी बैठक व सम्बद्ध सामाजिक, सांस्कृतिक, धार्मिक, ऐतिहासिक, पुरातात्विक व कलात्मक महत्वया सकतां वस्तु व सामग्रीया पूर्ण संरक्षण, स्वरुप व गुणस्तरय् अनाधिकृत हिउपाः महयेगुकथं मन्त्रालय व थ्व अन्तर्गतया निकायपाखें जुइगु जूगु दु ।

निगू मन्त्रालय दथुइ जूगु न्यागू बुँदाया सहमतिकथं येँयाः जात्राया इलय् मूल सांस्कृतिक व धार्मिक ज्याझ्वःया इलय् गद्दी बैठकय् दुगु थाय्या प्रयोग, उपयोग गृहया व्यवस्थापनय् जुइगु व अनच्वंगु भवन, बैठक, सभाहल, बार्दलि लगायत जःखःया सुचुकुचु, रंगरोगन, सुसाःकुसाः सुरक्षाया जिम्मेवारी हनुमानढोका दरवार हेरचाह अड्डां यायेगु खँ न्ह्यथनातःगु दु ।