ने. सं. ११४४ कौलाथ्व एकादशी - चालं

नेपालभाषा ब्वंकेगु बारे भर्च्युअल सम्वाद : मेगु भाय्या विद्यार्थी हतास जुइम्वाः

येँ (नेपालभाषा टाइम्स) – येँ महानगरपालिकां कक्षा १ निसें ८ तगिं तक नेपालभाषा ब्वंकेगु विषययात कयाः म्हिगः छगू भर्च्युअल सम्वाद ज्याझ्वः जूगु दु । भाषा आयोगया ग्वसालय् जूगु उगु ज्याझ्वलय् येँमनपा शिक्षा समितीया दुजः प्रा. डा. चुण्डा बज्राचार्यं नेपालभाषा पाठ्यक्रमया बारे ध्वाथुइकादीगु खः ।

उकथं हे भर्च्युअल सम्वादय् ब्वति कायेगु झ्वलय् तामाङ घेदुङया नायः मोहन गोलें तामाङ बस्तीया स्कुलय् तामाङ भाय् ब्वंकेत कुतः जुयाच्वंगु जानकारी बियादीगु खः । सम्वाद ज्याझ्वलय् टिप्पणीकार लिसे भाषाविद् अमृत योञ्जनं मातृभाषा ब्वंकेगु सम्बन्धी कानूनी व्यबस्थाया बारे जानकारी बियादिल । थःगु बिचाः तयेगु झ्वलय् योञ्जनं येँ मनपा दुने थौंकन्हय् नेवाः भाय् ल्हाइपिनिगु ल्याः १८६,५७४ म्ह दुसा तामाङ भाय्ल्हा इपिनिगु ल्याः ५६,४८१ म्ह दुगु तथ्यांक न्ह्वयब्वयादिल । वय्कलं येँमनपां गुगु आँट यानाः थःगु नगर दुने नेपालभाषा ब्वंकेगु निर्णय यात उकियात तिबः बीमाःगु खँ नं धयादीगु दु ।

अथे हे भर्च्युअल सम्वादय् ब्वति कयादीम्ह खास्तीया छगू स्कुलया हेडमास्तरं थःगु स्कुलय् तामाङ मस्त आपालं दुगुलिं न्हापां निसें स्थानीय विषयया रुपय् तामाङ भाय् ब्वंका च्वनागु जानकारी याकादीगु खः । सम्वाद ज्याझ्वलय् न्ववासें शिक्षाविद बिद्यानाथ कोइरालां येँय् नेवाःभाय्ब्वं के बलय् मेमेगु भाषा ल्हाइपिनिगु भाषिक अधिकार हनन् जुइ फइगु सम्भावना दुगुलिं मेमेगु भासं नं ब्वंकेत स्थानीय निकायं बः बीमाःगु खँ धयादिल ।

उकथं हे सम्वाद ज्याझ्वलय् न्ववायेगु झ्वलय् येँमनपाया शिक्षा विभागया प्रमुख मोतिराज खनालं नेवाः व गैरनेवाः फुक्कसित अःपुइ कथं पाठ्यक्रम तयार यानागु जूगुलिं मेगु जातिया बिद्यार्थीपिं हतास जुइम्वाःगु खँ स्पष्ट यानादिल । ज्याझ्वःया मूपाँहा येँ महानगरपालिकाया उपमेयर हरिप्रभा श्रेष्ठ, खड्गीं नेपालभाषा संरक्षण यायेत येँमनपां नेपालभाषा ब्वंकेगु निर्णय यानागु खँ न्ह्यथनादिल ।

ज्याझ्वःया नायः लिसे भाषा आयोगया अध्यक्ष डा. लवदेव अवस्थीं नेपालभाषा ब्वंकेगु निर्णययात लसकुस यासें येँमपायात सुभाय् देछायादीगु खः । वय्कलं लिपा वनाः पाठ्यक्रमयात समाबेशी यायेगु नं पाय्छि जुइगु बिचाः नं प्वंकादिल । ज्याझ्वलय् नेपालभाषा केन्द्रिय विभागया नायः डा. ओमकारश्वर श्रेष्ठ लगायत थीथी भाषाया अभियन्ता पिसं थःथःगु थासय् स्थानीय स्तरय् स्थानीय भाषां ब्वकेत जुयाच्वंगु तयारी बार जानकारी याकूगु खः । नेपालभाषा शिक्षा अभियानया अभियन्ता दीपक तुलाधरं थःथःगु थासय् थःगु भासं ब्वंकेमाःगु खँ धयादीगु खः ।

येँ मनपां थ्वहे शैक्षिक सत्रं निसें येँ मनपा दुने च्वंगु स्कुलय् नेपालभाषा ब्वंकेमाःगु व्यवस्था याःगु खः ।