चक्रपथयात बोर्ड खूगु द्वपं

येँ (नेपालभाषा टाइम्स)÷रिंगरोड तबाला यायेगु लागिं चीन सरकारं न्ह्याकूगु ज्या इलय् सिमधःगु खँयात कयाः येँ महानगरपालिका व चक्रपथ सुधार आयोजना दथुइ कचवं ब्वलनीगु सम्भावना पिहां वःगु दु ।

थौंकन्हय् चक्रपथ सुधार आयोजनापाखें थःपिनि निगूगु चरणया ज्या कथं कलंकींनिसें महाराजगञ्जतक लँ तब्या यानाच्वंगु दु । तर इलय् ज्या सिमधयाः स्थानीय जनतायात समस्या जुल धकाः स्थानीय जनतां येँ मनपाय् गुनासो याः वःगुलिं येँ मनपां उगु लँ तब्या यायेगु ज्या जुयाच्वंगु थासय् हे बोर्ड तयाः थ्व लँ तब्या यायेगु ज्याया जिम्मेवार निकाय नेपाल सरकार व सांघाई कन्स्ट्रक्सन खः धकाः च्वयातःगु सुचं तयेगु ज्या याःगु खः । येँ मनपां तःगु अज्याःगु छुं बोर्डय् थ्व लँ तब्या यायेगु ज्या येँ मनपां यानाच्वंगु मखु धकाः नं च्वयातःगु खः ।

तर मनपां तःगु थज्याःगु सुचं फुक्क चक्रपथ सुधार आयोजनां चीका छ्वःगु दु । आयोजनापाखें थज्याःगु सुचं चीका छ्व धकाः मनपायात अल्टिमेटम सहित पौ छ्वःगु खः । तर अल्टिमेटमया म्याद क्वचायेधुंकूसां नं मनपां सुचंया बोर्ड मचीकूगु कारणं आयोजना थःपिंसं हे अज्याःगु बोर्ड चीका छ्वःगु खः ।

तर आयोजनापाखें बोर्ड चीका छ्वःगु ज्यायात मनपां धाःसा बोर्ड खुया यंकल धकाः खुँ पाः याःगु दु । आयोजनां हे बोर्ड खुया यंकल धकाः तप्यंक द्वपं मबिसे थःपिंसं लँया थीथी थासय् तयातयागु बोर्ड अज्ञात मनूतय्सं खुया यंकल धासें खुया यंकूगु बोर्ड माला बी माल धकाः मनपां प्रहरी कार्यालयय् उजुरी बिउगु दु ।
मनपां सर्वसाधारणयात सूचना बीत तयातयागु बोर्ड खुया यंकूगु धासें बोर्ड मालाः थुकिया बारे छानबिन यासें दोषीयात कारवाही यायेत समेत इनाप यासें प्रहरीयात उजुरी बिउगु खः ।

मेखे आयोजनापाखें धाःसा थःपिंसं ज्या यानाच्वनागु सतक सीमा दुने थःपिंत छुं जानकारी मबिसे बोर्ड तयेगु ज्या याःगुलिं थ्व बोर्ड फुक्क चीका छ्व धकाः थःपिंसं म्याद समेत तोके यानाः सुचं पिकयागु तर म्याद क्वचायेधुंकाः नं सुनानं चीकः मवःगुलिं थःपिंसं हे चीका छ्वयागु खः धकाः धाःगु दु ।

मनपां थ्व लँय् थःपिसं तयागु गुपाः बोर्ड खुया यंकूगु दावी याःगु दुसा चक्रपथ सुधार आयोजनां थःपिंसं खुपाः जक बोर्ड चीकागु दु धकाः लिसः बिउगु दु ।