निम्ह सर्जकयात आरबी प्रतिभा सिरपाः

ख्वप – भक्तपुर साहित्यिक समाजं निम्ह स्रष्टायात ‘आरबी फाउण्डेसन प्रतिभा पुरस्कार’ लःल्हाःगु दु । समाजया ग्वसालय् जूगु छगू ज्याझ्वःया दथुइ वाङ्मय शताब्दी पुरुष सत्यमोहन जोशीं ख्वपया निम्ह सर्जक कवि नवीनप्रकाश श्रेष्ठ व म्येँ हालामि सानुमैयाँ धौभडेलयात उगु पुरस्कार लःल्हानादीगु खः ।

समाजया नायः राजुराम मुनकःमिया सभापतित्वय् जूगु ज्याझ्वलय् वय्कलं च्वयादीगु म्येँया म्युजिक भिडियोया नं पितब्वज्या याःगु खः ।
समाजया ग्वसालय् जूगु ज्याझ्वलय् मूपाहां जोशीं निम्हं स्रष्टायात दोसल्लां न्ययेकाः ५,५५५ तका दांया लिसें हनापौ लःल्हानादीगु खः । मूपाहां जोशीयात नं अभिनन्दन याःगु ज्याझ्वलय् नवासें वय्कलं साहित्यया रचना व श्रृजना यायेगु ज्याय् न्हूगु पुस्ता नं न्ह्यःने वयेमाःगु खँय् बः बियादिसें साहित्य संस्कृतिया प्रवद्र्धन यायेगु ल्याय्म्ह पुस्ता न्ह्यज्यायेमाः धयादिल ।

ख्वपया संस्कृतिविद् तेजेश्वर बाबु ग्वंगलं साहित्यया सिर्जना व संस्कृतिया प्रवद्र्धन यायेगु ज्याय् ल्याय्म्ह पुस्तायात प्रोत्साहन बिया वनेमाःगु खँय् बः बियादिसें लिपांगु इलय् ख्वपय् साहित्यिक गतिविधि अप्वया वनाच्वंगु खँय् लसता प्वंकादिल । लिसें थज्याःगु ज्याझ्वलं निरन्तरता कया वनेमाः धासें ज्याझ्वःयात कयाः च्वछायादिल ।