लकडाउनया इलय् धोविचौरय् निःशुल्क नकेगु व्यवस्था

लकडाउनया इलय् आपालं मनूतय्त नयेगु समस्या जुयाच्वंगु दु । गुलिसितं स्थानीय निकायपाखें ग्वाहालि यानाच्वंगु दुसा गुलिसितं स्थानीय संघ संस्थातय्सं नकेगु व्यवस्था यानाच्वंगु जुल । अज्याःगु हे परोपकारी भावना सहित येँया धोविचौरय् नं धोविचौर युवा समूहया सक्रिय ल्याम्हतय्सं न्हि न्हिं नयेगु व्यवस्था यानाच्वंगु दु ।

स्थानीय नीम्ह ल्याम्हतय् सक्रियताय् वंगु वैशाष ४ गते निसें निरन्तर रुपं मनूतय्त नकेगु व्यवस्था जुयाच्वंगु खः । सनिलयया ५ बजे निसें ७ बजे करिव ३०० निसें ३५०म्ह तक मनूतय्त नकीगु व्यवस्था जुयाच्वंगु खः ।

छुं ई तक थःथःपिंसं ध्यबा म्हयाः नकेगु व्यवस्था जुयाच्वंगु खःसा लिपा अन दाताय्सं स्वइच्छां जाकि, केँ आदि बीहयेगु ज्या नं जूगु खँ नकयेगु ज्याय् सक्रिय जुयाच्वनादीम्ह किशोर माघियां कनादिल । मनूत दथुइ दूरी कायम यानाः नकेगु ज्या जुयाच्वंगु जानकारी नं बियादिल ।

थथे नकेगु ज्या विशेष यानाः कोरोनापाखें प्रभावित नयेत असुविधा जूपिं, निम्न वर्ग, मजदुर व बालं च्वनाच्वंपिंत ग्वाहालि जुइमाः धकाः यानाच्वंगु खँ स्थानीय सक्रिय युवा नापं गायक ईश्वर माघियां धयादिल ।

कामपा वडा नं १७ नापं प्रहरी प्रशासन व सेनानापया समन्वय यानाः थुगु ज्या जुयाच्वंगु खः ।