
येँ (नेपालभाषा टाइम्स)- येँया बसन्तपुली सम्पदामैत्री गमला स्टाय्न्ड तयेगु ज्या जूगु दु । २६१ क्वःगु सेना दिवसया लसताय् श्री शार्दुल जंग गुल्मपाखें बसन्तपुर हरियाली सौन्दर्यीकरण अभियान विस्तार कार्यक्रम अन्तर्गत सम्पदामैत्री गमला स्टाय्न्ड तःगु खः ।
श्री शार्दुल जंग गुल्मया गुल्मपति सेनानी पूर्ण प्रजापतिया परिकल्पना कथं तयार याःगु उगु गमला स्टाय्ण्डया उलेज्या वंगु बिहिवाः नवनियुक्त युवा तथा खेलकूद मन्त्री विराजभक्त श्रेष्ठं यानादीगु खः । ज्याझ्वलय् बागमति प्रदेशया सांसद शैलेन्द्र वज्राचार्य, वडा नं. १९ व २० या वडाध्यक्ष, कामनपा हनुमानध्वाखा दरवार क्षेत्र संरक्षण कार्यक्रमया प्रमुख चन्द्रगोपाल प्रधान, इन्द्रजात्रा व्यवस्थापन समितिया अध्यक्ष गौतम शाक्यपिनि उपस्थिति दुगु खः ।
ज्याझ्वलय् न्ववानादिसें गुल्मपति भाजु प्रजापतिं न्हापा बसन्तपुरय् जुइगु अस्तव्यस्त पार्किङ समस्या समाधान यायेत वि.सं. २०७७ सालय् शार्दुल जंग गुल्मपाखें बसन्तपुरय् सौन्दर्यीकरण ज्याझ्वः संचालन यानागु खँ कनादिल । ज्याझ्वलय् न्ववानादिसें मन्त्री श्रेष्ठं नेपाली सेनाया अग्रसरताय् तसकं बांलाःगु ज्याया सुरुवात जूगु धासें स्थानीयतय्सं नं थ्व अभियानया अपनत्व कायेमाः धयादिल ।
LEAVE YOUR COMMENTS