मोनोरेल ः छेँ थुने म्वायेक समाधान

येँ – येँ महानगरपालिकाया मेयर विद्यासुन्दर शाक्यं जनताया छेँ छखा हे मथुँसे सवारी समस्या समाधान यायेगु खःसा मोनोरेल हे दकलय् बांलाःगु विकल्प जुइगु खँ कनादीगु दु । म्हिगः थनया राष्ट्रिय सभागृहय् येँय् मोनोरेल निर्माणया लागिं चिनियाँ कम्पनीलिसे डीपीआर तयार यायेगु सहमतिपत्रय् हस्ताक्षर समारोहय् न्ववासें वय्कलं थ्व खँ कनादीगु खः ।

चीनया चाइना रेलवे २५ औं ब्युरो ग्रुप कम्पनीलिसे म्हिगः येँ मनपां उगु सहमति याःगु खः । सहमतिपत्रय् येँ मनपापाखें मेयर विद्यासुन्दर शाक्य व चाइना रेलवेपाखें विभागीय प्रमुख झ्यु ग्वाङविङं हस्ताक्षर यानादीगु खः ।मेयर शाक्यं येँया ट्राफिक जाम व प्रदूषणया समस्या समाधान यायेगु लागिं नं मोनोरेल आवश्यक जूगु खँ कनादिल ।

उगु हे ज्याझ्वलय् न्ववासें यल महानगरपालिकाया मेयर चिरिबाबु महर्जनं थःपिनिगु कार्यकाल क्वचाये न्ह्यः हे मोनोरेल निर्माण सम्पन्न जुइगु आशा प्वंकादिल । चाइना कम्पनीं रिंगरोडया पैदल मार्ग दुनेया निगूगु लाइनय् मोनोरेल चले याये फइगु सम्भावना दुगु रिपोर्ट बिउगु खः । थ्व मोनोरेल दयेकेत करिब १ खर्ब १६ अर्ब तका तुइगु प्रारम्भिक रिपोर्ट दुसां धाथें धाःसा थ्व खर्च अझ कम जुइ फइगु खँ धाःगु दु ।

चाइना कम्पनीं दछिया दुने डीपीआर तयार याये फइगु खँ धाःगु दु । थुकी रेलया डिजायन, स्टेशन, कुल लागत आदि सम्पूर्ण विवरण नं दुथ्याइ । येँया रिंगरोड २७ किलोमिटर दुसा थुकी स्वंगू चरण यानाः मोनोरेल दयेकेगु प्रस्ताव चिनियाँ कम्पनीं तःगु दु । थुकिया लागिं माःगु लगानी नं चिनियाँ कम्पनीं हे माला हइगु सहमति जूगु दु ।

सम्बन्धित बुखँ

LEAVE YOUR COMMENTS