कविताया निपु म्येँया म्युजिक भिडियो
येँ(नेपालभाषा टाइम्स)- नेपालभाषाया नांजाःम्ह म्येँ हालामि कविता जोशी श्रेष्ठया न्हूगु नेपालभाषाया म्येँया म्युजिक भिडियो शनिवाः छगू ज्याझ्वःया दथुइ पितब्वज्या याःगु दु । ताःईतक संगीत ख्यलं तापाक च्वनाच्वंम्ह म्येँ हालामि जोशीया निपु म्येँया म्युजिक भिडियो पिदंगु खः ।
थनया सीटीसी मलय् जूगु ज्याझ्वः म्येँ हालामि जोशीया बाःजु अमरलाल श्रेष्ठया सभापतित्वय् जूगु खःसा मूपाहांकथं जनकवि दुर्गालाल श्रेष्ठ व विशेष पाहांकथं जनगायक भृगुराम श्रेष्ठ झायादीगु खः ।
नेपालभाषा व नेपाली भाय्या नांजाःम्ह म्येँ हालामिलिसें संगीतकार मदुम्ह द्वारिकालाल जोशीया किपाय् स्वां देछासे न्ह्याःगु ज्याझ्वलय् म्येँ हालामि कविता जोशीं लसकुस यानादीगु खः । थः अबुयात लुमंकाः तसकं भाव विह्वल जुयादीम्ह वय्कलं थः अबु नेपालभाषा संगीतया जग जूगु व उगु जगय् संगीतया माध्यमं थम्हं हाकनं तँ तनेगु कुतःयात निरन्तरता बिया वनेगु जुइ धयादिल ।
ज्याझ्वलय् कविता जोशीं सः बियादीगु निपु म्येँ ‘जोवनया रंग’ व ‘घालं अप्वः वइत हे’ म्येँया म्युजिक भिडियो पितब्वज्या याःगु खः । निपुं म्येँया निर्देशन रामकृष्ण खड्गीं यानादीगु खः । छाँयाकन लूजः सिंह व सम्पादन बालकृष्ण वंशीं यानादीगु खः । थुगु म्येँय् सृष्टि महर्जन व युजन श्रेष्ठं अभिनया यानादीगु दु । अथे हे ‘घालं अप्वः वइत’ म्येँया छाँयाकनं व सम्पादन बालकृष्ण जल्मी (बीकें) यानादीगु खः ।
जोवनया रंगया म्येँ च्वमि कवि तबः मरु खःसा लसय् हनादीम्ह मनराजा नकःमि व संगीत संयोजन हरिशरण साय्मिं यानादीगु खः । अथे हे घालं अप्वः वइत हे म्येँया च्वमि कवयित्री प्रतिसरा साय्मि खःसा संगीत गोविन्द ह्यूमत व संगीत संयोजन जीवित जल्मीं यानादीगु खः ।
ज्याझ्वलय् मूपाहां जनकवि श्रेष्ठ, जनगायक श्रेष्ठ, पाहांकथं झायादीपिं न्हूदँ समारोह समितिया नायः नापं म्येच्वमि निरञ्जनरत्न शाक्य, जुजुकाजी रंजित, मनराजा नकःमि, गोविन्द ह्यूमतं द्वारिकालाल जोशी लिसें संगीतया थीथी पक्षयात कयाः नुगःखँ तयादीगु खः ।
ज्याझ्वलय् मदुम्ह जोशीया जहान कमला जोशीं मूपाहां, विशेष पाहां, म्युजिक भिडियोया कलाकार व प्राविधिकपिंत मतिनाया चिं लःल्हानादीगु खः ।
LEAVE YOUR COMMENTS