ने. सं. ११४४ ञलाथ्व नवमी -

भुखाचं चलः वइगु खतरा

येँ (नेपालभाषा टाइम्स) – म्हिगः सुथय् ५.१९ बजे ब्वःगु भुखाचं स्वनिगलय् छुं भचा कम्पन जक वःगु खःसां थुकिया केन्द्र जुयाच्वंगु सिन्धुपाल्चोक जिल्लाय् धाःसा भविष्यय् तःधंगु खतरा पिकाये फुगु खँ विज्ञतय्सं धाःगु दु ।

सिन्धुपाल्चोकया थाय्थासय् थौंकन्हय् ततःधंगु चलः वनाच्वंगु दु। उकी लानाः आपालं धनजन क्षति जुयाच्वंगु बुखँत वयाच्वंगु दु। म्हिगः वःगु ६ रेक्टर स्केलया शक्तिशाली भुखाचं थज्याःगु चलः वनीगु सम्भावना अझ अप्वये फुगु खँ विज्ञतय्सं धाःगु दु। भुखाय्या कम्पनं पहाडयात थर्के यानाः अन चिरिबाया वनीगु यक्व सम्भावना दु। २०७२ सालया भुखाचं नं सिन्धुपाल्चोक, दोल्खा आदि लागाया पहाडया यक्व थासय् चिरिबाःगु खँ विज्ञतय्सं धाःगु दु। थौंकन्हय् वा नं वयाच्वंगु दुसा थज्याःगु इलय् अथे पहाड चिरिबात धाःसा अन हानं हानं चलः वनीगु सम्भावना अप्वः दइ ।

सिन्धुपाल्चोकया भिरखर्कय् भदौ २८ गते चलः वनाः १४ म्ह मनूया ज्यान वंगु खःसा मेपिं १७ म्ह अझं तनाच्वंगु दनि । म्हिगः सुथय् सिन्धुपाल्चोकया राम्चे क्षेत्रयात केन्द्रविन्दु दयेकाः भुखाय् ब्वःगु खः । उगु भुचाखं स्वनिगःयात नं बांलाक हे संकूगु खःसा द्यनाच्वंपिं मनूत तकं जुरुमुरुं दना वःगु खः । भुखाय् लिपा आपालं मनूत छेँनं पिहां वयाः पिने च्वं वःगु खः ।

थ्व न्हूगु हे भुखाय् खः वा २०७२ सालया भुखाय्या हे लिभुखाय् खः धइगु खँ धाःसा सी मदुनि ।