पेट्रोल हयेत पाइप लायेगु ज्या बछि क्वचाल
येँ – पेट्रोलियम पदार्थ पाइपलाइन हयेगु निंतिं न्ह्यानाच्वंगु ज्या बछि क्वचाःगु खँ धाःगु दु । भारतीय सरकारया ग्वाहालिं भारतया मोतिहारीं निसें अमलेखगंज तक पाइप लायेगु ज्या जुयाच्वंगु खः । मुक्कं ७० किलोमिटर पाइप लायेमाःगुलिइ आःतकया दुने ३९ किलोमिटर पाइप लायेसिधयेधुंकूगु खँ धाःगु दु ।
पाइप लायेगु थाय् अमलेखगंज निसें रक्सौल तक ३६.२ किलोमिटर नेपाःया भूभागय् लाःसा रक्सौल निसें मोतिहारी तकया ब्व ३३.७ किलोमिटर लाः । आःतकया दुने नेपाःपाखे १७ किलोमिटर व भारत पाखे २२ किलोमिटर पाइप लायेसिधयेधुंकूगु दु । आः न्ह्यानाच्वंगु हे गतिं ज्या न्ह्यात धाःसा वइगु खुला दुने पाइपलाइन लायेगु ज्या क्वचाइगु अनुमान दु ।
आः नेपाःपाखे त्रिभुवन राजपथया गण्डक निसें परवानीपुर तक ५ किलोमिटर, जीतपुर बजारय् १ किलोमिटर, पथलैया निसें उत्तर अमलेखगंज ८.५ किलोमिटर पाइप लायेमाःथाय् धाःसा ज्या सुरु जूगु मदुनि । पाइप लायेगु ज्या पर्सा राष्ट्रिय निकुञ्जपाखे नं यायेमाःगुलिं आः वन मन्त्रालयलिसे नं खँल्हाबल्हा जुयाच्वंगु खँ धाःगु दु ।
नेपाल आयल निगमं पाइपलाइन पाखें वःगु पेट्रोलियम पदार्थयात न्हापां ट्यांकी जायेकेगु व उकिं ट्यांकरय् लोड यानाः वितरण यायेगु तयारी यानाच्वंगु दु । थुकिया निंतिं अमलेखगंज डिपोय् च्वंगु ट्यांकी नं सफा यायेगु ज्या जुयाच्वंगु खँ धाःगु दु । थ्व पाइपलाइन लाये सिधयेवं भारतीय आयल निगमया मोतिहारी डिपों उच्च क्षमताया पम्पपाखें घौछिया निगू लाख पेट्रोलियम पदार्थ अमलेखगंजया डिपेय् छ्वयाहइ ।
LEAVE YOUR COMMENTS