ज्यामितय्के अप्वः ध्यबा कयाच्वंगु समस्या ज्यंकेत मलेसिया सहमत
येँ – मलेसियाय् वनीपिं नेपाली ज्यामितय्पाखें यक्व ध्यबा म्हयाच्वंगु ज्या पनेगु निंतिं मलेसियाया अधिकारीत सहमत जूगु खँ धाःगु दु । क्वालालाम्पुरय् जूगु बैठकय् बैठकय् मलेसियाया अधिकारीत नेपाली ज्यामित समस्या समाधान यायेत सकारात्मक जूगु खँ बैठकय् सहभागी नेपाली अधिकारीतय्सं धाःगु दु ।
बैठकय् मलेसिया स्थित नेपाली दूतावासया प्रतिनिधिपिंसं मलेसियाया मानव संशाधन मन्त्रालयया अधिकारीत लिसे सहलह याःगु खः । मलेसियाय् वनीपिं नेपाली ज्यामितय्त थीथी शीर्षकय् यक्व शुल्क म्हयाः ठगे यानाच्वंगुलिं नेपालं वंगु निला न्ह्यवनिसें मलेसियाय् ज्यामित छ्वयेत हे प्रतिबन्ध तयातःगु दु ।
मलेसियाया मानव संशाधन मन्त्रालयय् मंगलवाः जूगु बैठकय् नेपाली ज्यामितय्त बाध्य यानाः पुले मायेकाच्वंगु चर्को शुल्क म्हो यायेगु, आउटसोर्सिङ कम्पनी खारेज यायेगु, ज्यामि भर्ना प्रक्रिया सहज व प्रभावकारी दयेकेगु व श्रम सम्झौता यायेगु विषयय् सहलह जूगु खँ नेपाली दूतावासया कार्यवाहक राजदूत कुमारराज खरेलं कनादिल ।
वंगु वालय् नेपाली दूतावासया ब्वनाय् दूतावासय् झाम्ह मलेसियाली मानव संशाधन मन्त्री एम कुलासेगनरं नं नेपाली ज्यामितय्पाखें ठगे यानाच्वंगु खँय् मलेसिया गम्भीर दुगु खँ धयादीगु खः । मंगलवाः जूगु बैठकय् धाःसा नेपाली पक्षं नेपालं मलेसियाय् ज्यामित छ्वयेत प्रतिबन्ध तयातःगु कारण बारे विस्तृत रुपं खँ तःगु खः ।
उबलय् नेपाली पक्षं अवैध रुपं ध्यबा म्हया च्वंगु पनेत व निगू देय् दथुइ श्रम सम्बन्ध सुदृढ यायेत मलेसियाली सरकारया ध्यनाषर्कण याःगु खः ।कार्यवाहक राजदूत कुमारराज खरेलं बिबिसी लिसे खँ ल्हासें बैठकय् नेपाली ज्यामितय्सं पुलेमालाच्वंगु तच्वःगु भिसा शुल्क लिसें अनावश्यक कम्पनीत खारेज यायेगु सम्बन्धी मागयात हाकनं न्ह्यब्वयागु खँ कनादीगु दु ।
थुकिया लिसलय् मलेसियन अधिकारीतय्सं थ्व खँय् थःपिं गम्भीर दुगु व थुकियात कयाः याकनं हे निर्णय यायेगु प्रतिबद्धता प्वंकूगु खँ धाःगु दु । कार्यवाहक राजदूत खरेलया कथं मन्त्रीस्तरीय सहलह यानाः थ्व समस्या ज्यंकेगु खँ मलेसियन अधिकारीतय्सं धयावंगु खः ।
नेपाली ज्यामितपाखें यक्व शुल्क म्हयेगु ज्याय् मलेसिया व नेपाःया हे गुलिखे प्रभावशाली नेता व व्यवसायीतय् मिलोमतो जुयाच्वंगु खँ पिहां वयाच्वंगु दु । मलेसियाया सांसदतय्सं थुकियात कयाः छानविन यायेत अनया सरकारयात हे माग यायेधुंकूगु दु ।
LEAVE YOUR COMMENTS