टि–२० श्रृंखला – नेपाः नामिबियापाखें पराजित
येँ ९नेपालभाषा टाइम्स०÷ नेपाःया किपूस्थित टियु मैदानय् जुयाच्वंगु त्रिकोणात्मक टि–२० सिरिजया न्हापांगु कासाय् नेपाः पराजित जूगु दु । नेपाः, नेदरल्यान्डस व नामिबिया दुथ्याःगु सिरिजया मंगलवाः जूगु कासाय् नेपाःयात नामिबियां २० रनं बुकूगु दु । थ्वयां न्ह्यः जूगु त्रिकोणात्मक एकदिवसीय श्रृंखलाया निगुलिं कासाय् नं नामिबियां नेपाःयात बुकूगु खः ।
कासा त्याकेगु निंतिं २०७ रनया विशाल लक्ष्य ज्वनाः मैदानय् कुहां वःगु नेपाःया टिम १८।५ ओभरय् मुक्कं १८६ रन दयेकाः अल आउट जूगु खः । थ्वयां न्ह्यः ब्याटिङ याःगु नामिबियाः प्यंगू विकेटया क्षतिइ २०६ रन दयेकूगु खः । नेपाःया निंतिं दीपेन्द्र सिंह ऐरीं ४८ रन व कप्तान रोहित पौडेलं ४२ रन दयेकलसा आसिफ शेखं ६ रन, कुशल मल्लं ३२ रन, गुलशन झां १२ रन, सन्दीप जोरां , सोमपाल कामींं १९ रन व विवेक यादवं ६ रन दयेकूगु खः ।
नामिबियाया निंतिं रुबेन ट्रम्पलम्यान याकःचाः प्यंगू विकेट काःगु खः । ट्रम्पलम्यानं नेपाःया ओपनर कुशल भुर्तेलयात इनिङया न्हापांगु बलय् हे आउट याःगु खःसा आसिफयात स्वंगू ओभरय् मुक्कं ६ रन दयेकूबलय् आउट याःगु खः ।
नामिबियाया निंतिं जान निकोल लोफ्टि इटनं विस्फोटक ब्याटिङ यासें कीर्तिमान शतक दयेकूगु खः । इटनं ३३ बलय् शतक पूवंकुसें नेपाःया कुशल मल्लं तयातःगु कीर्तिमान त्वाःथःगु खः ।
कुशलं सन् २०२३ य् १९ क्वःगु एशियाली खेलकूदय् मंगोलिया विरुद्ध ३४ बलय् शतक दयेकूगु खः । इटन ३६ बलय् ११ चौका व च्यागु छक्का थ्वानाः १०१ रन आउट जूगु खः । इटनया शतकया ग्वाहालिं नामिबियां निर्धारित २० ओभरय् ४ विकेटया क्षतिइ २०६ रन दयेकूगु खः ।
नामिबियाया निंतिं मलान क्रुगरं ४८ बलय् ५९ रन दयेकूगु खःसा ओपनर माइकल भान लिंगने १९ बलय् २० रन दयेकूगु खः । अथेहे जेपी कोट्जें ९ बलय् ११ रनया योगदान बिउगु खः ।
नेपालं अन्तिम ९ ओभरय् जक १४० रन खर्च याःगु खः । नेपाःया निंतिं कप्तान पौडेलं निगू विकेट व करण केसी व अविनाश बोहरां छगू छगू विकेट काःगु खः ।
LEAVE YOUR COMMENTS