रसिया विश्वकप समूह चरणया छुं तथ्य
रुसय् जुयाच्वंगु फिफा विश्वकप फुटबलया २१ औं संस्करणया समूह चरणया कासा क्वचायेधुंकूगु दु । थनिंनिसें नकआउट चरणया कासा शुरु जू वनाच्वंगु दु । रुस विश्वकप दुथ्याःगु ३२ गू राष्ट्रं समूह चरणया दक्वं कासा म्हितूगु ईतकया दुने ४८ कासा सिधःगु दु । मुक्कं ६४ कासा म्हितीगु विश्वकपय् आः ल्यं दुगु कासा धइगु झिंगू हे जक खः ।
समूह चरणया कासा क्वचाःगु तकया दुने छुं छुं बांलाःगु व उपाधिया दावेदारकथं कयातःगु देय्या यात्रा क्वचाःगु दु । आः ल्यं दुगु कासाय् गथे जुइधकाः सकसिनं थःथःगु थासं अनुमान यायेगु नं यानाच्वंगु दु । गुलिसिनं पुलांगु टीमं विश्वकप त्याकीगु अनुमान यानाच्वंगु दुसा गुलिसिनं न्हूगु टीम विश्व विजेताया रुपय् न्ह्यःने वइगु अनुमान नं यानाच्वंगु दु ।
पूर्वानुमानयात छखे तयाः समूह चरणया कारायात ध्यान बीगु खःसा ४८ गू कासाय् मुक्कं १२२ गू गोल जूगु दु । दक्वं कासाय औसतया रुपय् स्वयेगु खःसा औसतय् २.५ गोल जूगु दु । दक्वं गोलया निंतिं ३६,३४० बल पास जूगु दु । समूह चरणया कासा क्वचाःगु ईतकया दुने झिंस्वम्ह कासामिं निगू–निगू गोल याःगु दुसा ख्वीच्याम्ह कासामिं छगू – छगू गोल याःगु दु ।
समग्रय् स्वयेगु खःसा आतकया दुने ८६म्ह कासामिं रुस विश्वकपय् गोल यायेधुंकूगु दु । अथे हे कार्डया सम्बन्धय् समूह चरणया दक्वं कासा क्वचाःगु अवधित कया दुने मुक्कं स्वंगू हे जक ह्याउँगु कार्ड प्रयोग जूगु दुसा जबकि म्हासुगु कार्ड १५८ प्रयोग जूगु दु । औसतय् दक्वं कासाय् म्हासुगु कार्डया प्रयोग ३.४ दु ।
समूह चरणय् दकलय् अप्वः गोल याःम्ह कासामिया रुपय् इंग्ल्याण्डया कप्तान ह्यारी केन दकलय् न्ह्यःने दु । केनं समूह चरणया स्वंगू कासा म्हितेगु झ्वलय् न्यागू गोल याःगु दुसा वयां लिपा बेल्जियमया रोमेलु लुकाकु व पोर्चुगलया कप्तान क्रिष्टियानो रोनाल्डो दु । थुपिं निम्हेसिनं ४–४ गोल यानातःगु दु । विश्वकप आयोजक रुसया डेनिस चेरसेभ व स्पेनया डिएगो कोस्टां ३–३ गोल यानातःगु दु ।
गोल्डेन बुटया दावेदार थुपिं सकलें कासामिया विश्वकप यात्रा जारी हे दु । थुकथं हे समूह चरणया कासाय् दकलय् अप्वः गोल याःगु देय् खः बेल्जियम । समूह चरणया स्वंगू कासा म्हितेगु झ्वलय् बेल्जियमं ९ गोल याःगु दुसा वयां लिपा इंग्ल्याण्ड व रुसं समान ८–८ गोल याःगु दु । वयां लिपा क्रोएसियां ७ व स्पेनं ६ गोल यानातःगु दुसा कोलम्बिया, उरुग्वे, ब्राजिल, पोर्चुगल, ट्युनिसिया, स्वीडेन व स्वीट्जरल्याण्डं ५–५ गोल यानातःगु दु ।
थुगुसीया विश्वकपय् छगू हे कासाय् दकलय् अप्वः गोल जूगु धइगु बेल्जियम व ट्युनिसिया अथे हे इंग्ल्याण्ड व पनामा दथुइ जूगु कासाय् खः । थ्व निगुलिं कासाय् ७ गोल जूगु दु । बेल्जियमं ट्युनिसियायात ५–२ गोलं बुकूगु खःसा इंग्ल्याण्ड व पनामायात ६–१ गोलं बुकूगु खः ।
समूह चरणया कासाय् मात्र स्वंगू देशं शतप्रतिशत लिच्वः पिकायेत सफल जूगु दु । इपिं खः उरुग्वे, क्रोएसिया व बेल्जियम । ब्राजिलया नेयमारं जारी विश्वकपय् गोलया निंतिं दकलय् अप्वः कुतः याःगु दु । नेयमारं स्वंगू कासाय् १७ क्वःतक गोलया निंतिं पोस्टय् प्रहार याःगु खः ।
LEAVE YOUR COMMENTS