स्वयेबहम्ह कासामि

रोमेलु लुकाकु, स्ट्राइकर, बेल्जियम

रोमेलु लुकाकु बेल्जियमया मुख्य स्ट्राइकर खः । १६ दँ दुबलय् फुटबल क्यारियर शुरु याःम्ह लुकाकु थौंकन्हय् प्रिमियरशीप क्लब म्यानचेस्टर युनाइटेड पाखें म्हिताच्वंगु दु । थ्वयां न्ह्यव व चेल्सी व इभर्टनं म्हितेधुंकूम्ह खः । सन् २०१० य् बेल्जियम टिमय् डेब्यु याःम्ह लुकाकुं न्हापांगु कासा क्रोसिया विरुद्ध म्हितूगु खः । सन् २०१४ या विश्वकप व २०१६ या युरोकपय् नं लुकाकुं बेल्जियमपाखें म्हितूगु खः ।

बेल्जियमया निंतिं ७० गू कासा म्हिताः ४० गू गोल यायेधुंकूम्ह लुकाकु बेल्जियमया निंतिं दकलय् अप्वः गोल याःपिं मध्ये छम्ह लाः । आः जुयाच्वंगु विश्वकपय् नं लुकाकुं प्यंगू गोल यायेधुंकूगु दु । ब्राजिल विरुद्ध जूगु क्वार्टरफाइनल कासाय् लुकाकुया पासय् हे डि ब्रायनां विजयी गोल याःगु खः ।