आनन्दकुटी आइसोलेसनयात ताइवानी संस्थाया ग्वाहालि

येँ-येँ महानगरपालिका ववडा नं. १५ स्वयम्भूस्थित आनन्दकुटी विद्यापीठ संचालन जुयाच्वंगु आइसोलेसन सेन्टरयात ताइवानया छगू संस्थां थीथी हलंज्वलं ग्वाहालि याःगु दु । आनन्दकुटी आइसोलेसनयात ताइवानी संस्था चु जी फाउण्डेसनं अटोक्लेभ मेशिन, पोर्टेबल एक्स–रे मेशिन व ईसीजी मेशिन ग्वाहालि याःगु खः ।

भिक्षु मैत्री महास्थविर व मुकुन्द विष्टं फाउण्डेसनपाखें प्राप्त स्वास्थ्य सामग्री आइसोलेसन सेन्टरया संरक्षकलिसें येँ क्षेत्र नं ८या प्रतिनिधिसभा सदस्य जीवनराम श्रेष्ठयात लःल्हानादीगु खः । सांसद श्रेष्ठया हे पहलय् आनन्दकुटी विद्यापीठय् ५० बेड क्षमताया आइसोलेसन सेन्टर संचालन जुया वयाच्वंगु दु । सांसद श्रेष्ठया सांसद विकास कोष अन्तर्गत स्थानीय पूर्वाधार विकास साझेदारी ज्याझ्वः अन्तर्गतया वजेटपाखें उगु आइसोलेसन सेन्टर संचालन जुया वयाच्वंगु खः ।

आनन्दकुटी आइसोलेसनय् आतक नीस्वम्ह कोरोना संक्रमित अझं स्वास्थ्य लाभ यानाच्वंगु दुसा २५ म्ह कोरोना मुक्त जुयाः छेँय् लिहां वनेधुंकूगु दु । कोरोना मुक्त जुया वंपिंत आइसोलेसन सेन्टरपाखें थर्मोमिटर, अक्सिमिटर, मास्क, सेनिटाइजर, कोेभिडसम्बन्धी जानकारीमूलक सामग्री व आवश्यक निःशुल्क वासः नं बिया याना वयाच्वनागु सांसद श्रेष्ठं कनादिल ।

येँ महानगरपालिका वडा नं. १५ व स्थानीयवासीया ग्वाहालिं संचालन जुयाच्वंगु आइसोलेसन सेन्टरय् कोरोना संक्रमितया उचित व्यवस्थापनया निंतिं २४ घन्टा हे चिकित्सक सेवा, नर्सिङ सेवा, संक्रमितया छेँजःपिंनिगु पीसीआर परीक्षण, पोषयुक्त नसाज्वलंया सुविधा निःशुल्क रुपं बिया वयाच्वंगु दु । आइसोलेसनया निंतिं चिकित्सक व नर्सिङ सेवा काठमाडौं मोडेल अस्पताल नर्सिङ कलेजया पुचलं बिया वयाच्वंगु दु ।

थ्व स्वयां न्ह्यः नं आइसोलेसनयात ताइवानया उगु संस्थां अक्सिजन कन्सनटे«टर ग्वाहालि याःगु खः ।

सम्बन्धित बुखँ

LEAVE YOUR COMMENTS