येँया छेँ दनेगु मापदण्ड संशोधन

आः येँय्या भित्री लागाय् च्यातँजाः तक छेँ दने दइगु

येँ – येँ महानगरपालिकां येँ देय्या भित्री लागाय् छेँ दनेगु मापदण्ड संशोधन याःगु दु । येँ देय्या भित्री लागाय् न्हापा याना तःगु व्यवस्थाय् संशोधन यासें स्थानीय जनतायात राहत जुइ कथं भवन निर्माण सम्बन्धी न्हूगु मापदण्ड जारी याःगु खः । थ्व न्हूगु मापदण्ड कथं येँ देय्या पुलांगु नगर दुने आः ७५ फिट तक छेँ दने फइगु जूगु दु । न्हापा थ्व लागाय् ४५ फिट तक जक छेँ दने फइगु व्यवस्था याना तःगु खः ।

अथे हे सम्पदा क्षेत्र धकाः वर्गीकरण याना तःगु लागा दुने नं आः ६५ फिट तक छेँ दने फइगु जूगु दु । छेँया जाः ७५ फिट जुइबलय् अन ८ तल्ला तक छेँ दने फइ । अथे हे ६५ फिट जुइबलय् ७ तल्ला तक छेँ दने फइ । उकथं हे सम्पदा संरक्षित लागाय् छतँजाः तक बेसमेन्ट दयेके फइगु व्यवस्था नं याःगु दु । मेमेगु लागाय् धाःसा नितँजाः तक बेसमेन्ट तये फइगु व्यवस्था याना तःगु दु । अथे बेसमेन्ट तयेबलय् छुं नं कथंया सम्पदा, लः, धःया पाइप जःलाखःलायात लिच्वः लाके मजिउ । तःभुखाय् लिपा थनया छेँयात अझ बल्लाक व उपयोगी जुइक दनेगु धइगु ताः तयाः येँ मनपां थ्व न्हूगु मापदण्ड दयेकाः जारी याःगु खः । मनपां तयार याःगु थ्व मापदण्ड छुं ई न्ह्यः जूगु नगर परिषद्या बैठकं नं पारित यायेधुंकूगु दु ।

स्थानीय जनतायात राहत

येँ महानगरपालिकापाखें हःगु थ्व न्हूगु मापदण्डं यानाः आः येँय् दाजुकिजाया दथुइ बासया अभाव मजुइगु खँ धाःगु दु । छेँ तखा दने मजिउगु कारणं दाजुकिजापिं छम्ह छेँ त्वःताः पिहां वने माःगु जुयाः स्थानीय लागां विस्थापित जुइ मालीगु अवस्थायात थुकिं छुं भचा जूसां राहत बीगु आशा यानातःगु दु । थौंकन्हय् येँ देशय् न्हूगु छेँ दनेगु लागिं खाली जग्गा मदयेधुंकूगु कारणं थनया आवास समस्या मदयेकेगु खःसा आः तल्ला थपे यायेगु जक विकल्प दुगु खँ धाःगु दु ।

येँ मनपा २२ वडाया अध्यक्ष चिनीकाजी महर्जनं थ्व संशोधनयात राहमतमुखी ज्या धयादीगु दु । नेपालभाषा टाइम्सलिसे खँ ल्हासें वय्कलं येँया सम्पदा लागा जःखः च्वंपिं जनता धइपिं हे उगु सम्पदाया संरक्षक खः, तर उपिं हे सम्पदा क्षेत्र धइगु नामय् पीडित जुयाच्वनेमाःगु कारणं उमित राहत बीगु लागिं नं थज्याःगु संशोधन आवश्यक जूगु खँ कनादिल ।