रामग्रामया सम्झौता रद्द

येँ (नेपालभाषा टाइम्स)- गौतम बुद्धया अस्तिधातु तयातःगु रामग्रामया ऐतिहासिक स्तुप उत्खनन लिसें अन बौद्ध स्तुप दयेकः सौन्दर्यकरण यायेगु लागिं छगू निजी कम्पनीलिसे लुम्बिनी विकास कोषं याःगु सम्झौता व समझदारी रद्द जूगु दु । लुम्बिनी विकास कोष कार्यकारिणी समितिया बैठकं उगु सम्झौता रद्द यायेगु निर्णय याःगु खः ।

प्रतिनिधिसभाया सार्वजनिक लेखा समितिं वंगु आइतावाः थ्व सम्झौताया फुक्कं प्रक्रिया रद्द यायेगु लागिं कोषयात निर्देशन बिउगु खः । उगु निर्देशन लिपा म्हिगः संस्कृति, पर्यटन तथा नागरिक उड्डयन मन्त्री सुदन किरातीया अध्यक्षताय् च्वंगु कोषया बैठकं निर्देशन कार्यान्वयन यासें सम्झौता रद्द यायेगु निर्णय याःगु खः ।

नवलपरासीया रामग्राम क्षेत्रया २२० विघा जमिन ९९ दँया नितिं निजी कम्पनी द प्रमिस्ड ल्यान्डयात बिना प्रतिस्पर्धा बीगु नितिं कोषं २०८० असोज २९ गते समझादारी याःगु खः । संस्कृति मन्त्रालय, अर्थ मन्त्रालय व पुरातत्व विभागया लिखित असहमति दयेक दयेकं हे कानुन अःखः स्थानीय वासिन्दाया जग्गा, पुरातत्व विभागया जग्गा व कोषया जग्गा लिजं बीगु निर्णय याःगु धासें थुकिया विरोध जूगु खः ।

रामग्राम सौन्दर्यकरण सम्बन्धी थ्व सम्झौता याःगु कारणं कोषया उपाध्यक्ष रिम्पोछे ल्हारक्याल लामा नं गाक्कं विवादय् वःगु खः । रामग्रामया थ्व ठेक्का प्रधानमन्त्री पुष्पकमल दाहालया घरपतिया काययात बिउगु कारणं नं थ्व विवादय् लाःगु खँ धाःगु दु ।

सम्झौता विवादय् लायेवं थीथी बौद्ध संघ संस्था व रामग्रामया स्थानीय जनतां समेत थुकिया विरोध यासें थ्व परियोजनाया लागिं नेपाल सरकार थःपिंसं हे लगानी यायेमाः धकाः माग याःगु खः । सार्वजनिक लेखा समितिं नं निजी कम्पनीलिसे जूगु सम्झौता रद्द यानाः सरकारपाखें हे रामग्राम विकासया लागिं बजेट विनियोजन यायेमाः धकाः निर्देशन बिउगु खः । सरकारं रामग्रामया लागिं गुलि बजेट तइ धइगु खँ धाःसा निश्चित मजूनिगु खँ नं धाःगु दु ।